౩. వీథిసమ్మజ్జకత్థేరఅపదానవణ్ణనా

ఉదేన్తం సతరంసిం వాతిఆదికం ఆయస్మతో వీథిసమ్మజ్జకత్థేరస్స అపదానం. అయమ్పి పురిమబుద్ధేసు కతాధికారో అనేకేసు జాతిసతేసు కతపుఞ్ఞసఞ్చయో సిఖిస్స భగవతో కాలే కులగేహే నిబ్బత్తో ఘరావాసం వసన్తో నగరవాసీహి సద్ధిం వీథిం సజ్జేత్వా నీయమానం భగవన్తం దిస్వా పసన్నమానసో వీథిం సమం కత్వా ధజం తత్థ ఉస్సాపేసి.

౧౫. సో తేనేవ పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే ఏకస్మిం కులే నిబ్బత్తో విఞ్ఞుతం పత్వా సత్థు ధమ్మదేసనం సుత్వా పటిలద్ధసద్ధో బహుమానహదయో పబ్బజిత్వా లద్ధూపసమ్పదో నచిరస్సేవ అరహా హుత్వా అత్తనో పుబ్బకమ్మం అనుస్సరన్తో పచ్చక్ఖతో జానిత్వా పుబ్బచరితాపదానం పకాసేన్తో ఉదేన్తం సతరంసిం వాతిఆదిమాహ. తత్థ ఉదేన్తం ఉగ్గచ్ఛన్తం సతరంసిం సతపభం. సతరంసీతి దేసనాసీసమత్తం, అనేకసతసహస్సపభం సూరియం ఇవాతి అత్థో. పీతరంసింవ భాణుమన్తి పీతరంసిం సంకుచితపభం భాణుమం పభావన్తం చన్దమణ్డలం ఇవ సమ్బుద్ధం దిస్వాతి అత్థో. సేసం సువిఞ్ఞేయ్యమేవాతి.

వీథిసమ్మజ్జకత్థేరఅపదానవణ్ణనా సమత్తా.