౧౦. కుముదదాయకత్థేరఅపదానవణ్ణనా

హిమవన్తస్సావిదూరేతిఆదికం ఆయస్మతో కుముదదాయకత్థేరస్స అపదానం. అయమ్పి థేరో పురిమబుద్ధేసు కతాధికారో అనేకేసు భవేసు వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే హిమవన్తస్స ఆసన్నే మహన్తే జాతస్సరే కుకుత్థో నామ పక్ఖీ హుత్వా నిబ్బత్తో కేనచి అకుసలేన పక్ఖీ సమానోపి పుబ్బే కతసమ్భారేన బుద్ధిసమ్పన్నో పుఞ్ఞాపుఞ్ఞేసు ఛేకో సీలవా పాణగోచరతో పటివిరతో అహోసి. తస్మిం సమయే పదుముత్తరో భగవా ఆకాసేనాగన్త్వా తస్స సమీపే చఙ్కమతి. అథ సో సకుణో భగవన్తం దిస్వా పసన్నచిత్తో కుముదపుప్ఫం డంసిత్వా భగవతో పాదమూలే పూజేసి. భగవా తస్స సోమనస్సుప్పాదనత్థం పటిగ్గహేత్వా అనుమోదనమకాసి.

౫౧. సో తేన పుఞ్ఞేన దేవమనుస్సేసు ఉభయసమ్పత్తిసుఖం అనుభవిత్వా ఇమస్మిం బుద్ధుప్పాదే సావత్థియం అఞ్ఞతరస్మిం కులే నిబ్బత్తో వుద్ధిమన్వాయ మహద్ధనో మహాభోగో రతనత్తయే పసన్నో సత్థు ధమ్మదేసనం సుత్వా పటిలద్ధసద్ధో పబ్బజిత్వా నచిరస్సేవ అరహా హుత్వా అత్తనో పుబ్బకమ్మం పచ్చక్ఖతో ఞత్వా సోమనస్సజాతో పుబ్బచరితాపదానం పకాసేన్తో హిమవన్తస్సావిదూరేతిఆదిమాహ. పదుముప్పలసఞ్ఛన్నోతి ఏత్థ సతపత్తేహి సమ్పుణ్ణో సేతపదుమో చ తీణి నీలరత్తసేతుప్పలాని చ పదుముప్పలాని తేహి సఞ్ఛన్నో గహనీభూతో సమ్పుణ్ణో మహాజాతస్సరో అహూతి సమ్బన్ధో. పుణ్డరీకసమోత్థటోతి పుణ్డరీకేహి రత్తపదుమేహి ఓత్థటో సమ్పుణ్ణోతి అత్థో. సేసం సువిఞ్ఞేయ్యమేవాతి.

కుముదదాయకత్థేరఅపదానవణ్ణనా సమత్తా.

సోళసమవగ్గవణ్ణనా సమత్తా.