౧౭. సుపారిచరియవగ్గో

౧. సుపారిచరియత్థేరఅపదానవణ్ణనా

పదుమో నామ నామేనాతిఆదికం ఆయస్మతో సుపారిచరియత్థేరస్స అపదానం. అయమ్పి పురిమమునిపుఙ్గవేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే యక్ఖయోనియం నిబ్బత్తో హిమవతి యక్ఖసమాగమం గతో భగవతో దేవయక్ఖగన్ధబ్బనాగానం ధమ్మదేసనం సుత్వా పసన్నమానసో ఉభో హత్థే ఆభుజిత్వా అప్ఫోటేసి నమస్సి చ. సో తేన పుఞ్ఞేన తతో చుతో ఉపరి దేవలోకే ఉప్పన్నో తత్థ దిబ్బసుఖం అనుభవిత్వా మనుస్సేసు చ చక్కవతిఆదిసమ్పత్తియో అనుభవిత్వా ఇమస్మిం బుద్ధుప్పాదే సావత్థియం గహపతికులే నిబ్బత్తో అడ్ఢో మహద్ధనో మహాభోగో రతనత్తయే పసన్నో సత్థు ధమ్మదేసనం సుత్వా సద్ధాజాతో పబ్బజిత్వా నచిరస్సేవ అరహత్తం పాపుణి.

౧. సో ఏకదివసం అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పదుమో నామ నామేనాతిఆదిమాహ. తత్థ పదుమోతి యస్స పాదనిక్ఖేపసమయే పథవిం భిన్దిత్వా పదుమం ఉగ్గన్త్వా పాదతలం సమ్పటిచ్ఛతి, తేన సఞ్ఞాణేన సో భగవా పదుమోతి సఙ్ఖం గతో, ఇధ పదుముత్తరో భగవా అధిప్పేతో. సో భగవా పవనా వసనవిహారా అభినిక్ఖమ్మ వనమజ్ఝం పవిసిత్వా ధమ్మం దేసేతీతి సమ్బన్ధో.

యక్ఖానం సమయోతి దేవానం సమాగమో ఆసి అహోసీతి అత్థో. అజ్ఝాపేక్ఖింసు తావదేతి తస్మిం దేసనాకాలే అధిఅపేక్ఖింసు, విసేసేన పస్సనసీలా అహేసున్తి అత్థో. సేసం పాకటమేవాతి.

సుపారిచరియత్థేరఅపదానవణ్ణనా సమత్తా.

౨. కణవేరపుప్ఫియత్థేరఅపదానవణ్ణనా

సిద్ధత్థో నామ భగవాతిఆదికం ఆయస్మతో కణవేరపుప్ఫియత్థేరస్స అపదానం. అయమ్పి పురిమబుద్ధేసు కతాధికారో సిద్ధత్థస్స భగవతో కాలే సుద్దకులే నిబ్బత్తో వుద్ధిమన్వాయ రఞ్ఞో అన్తేపురపాలకో అహోసి. తస్మిం సమయే సిద్ధత్థో భగవా భిక్ఖుసఙ్ఘపరివుతో రాజవీథిం పటిపజ్జి. అథ సో అన్తేపురపాలకో చరమానం భగవన్తం దిస్వా పసన్నమానసో హుత్వా కణవేరపుప్ఫేన భగవన్తం పూజేత్వా నమస్సమానో అట్ఠాసి. సో తేన పుఞ్ఞేన సుగతిసమ్పత్తియోయేవ అనుభవిత్వా ఇమస్మిం బుద్ధుప్పాదే ఏకస్మిం కులే నిబ్బత్తిత్వా వుద్ధిప్పత్తో సత్థు ధమ్మదేసనం సుత్వా పటిలద్ధసద్ధో పబ్బజిత్వా నచిరస్సేవ అరహా అహోసి.

౭. సో పత్తఅగ్గఫలో పుబ్బే కతకుసలం సరిత్వా సఞ్జాతసోమనస్సో పుబ్బచరితాపదానం పకాసేన్తో సిద్ధత్థో నామ భగవాతిఆదిమాహ. తం సబ్బం హేట్ఠా వుత్తత్తా ఉత్తానత్థమేవాతి.

కణవేరపుప్ఫియత్థేరఅపదానవణ్ణనా సమత్తా.

౩. ఖజ్జకదాయకత్థేరఅపదానవణ్ణనా

తిస్సస్స ఖో భగవతోతిఆదికం ఆయస్మతో ఖజ్జకదాయకత్థేరస్స అపదానం. అయమ్పి పురిమజినవరేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో తిస్సస్స భగవతో కాలే సుద్దకులే నిబ్బత్తో భగవన్తం దిస్వా పసన్నమానసో అమ్బజమ్బుఆదిమనేకం మధురఫలాఫలం నాళికేరం పూవఖజ్జకఞ్చ అదాసి. భగవా తస్స పసాదవడ్ఢనత్థాయ పస్సన్తస్సేవ పరిభుఞ్జి. సో తేన పుఞ్ఞేన సుగతిసమ్పత్తియోయేవ అనుభవిత్వా ఇమస్మిం బుద్ధుప్పాదే సావత్థియం కులగేహే నిబ్బత్తో విఞ్ఞుతం పత్వా సత్థు ధమ్మదేసనం సుత్వా సఞ్జాతసద్ధో పసాదబహుమానో పబ్బజిత్వా వత్తపటిపత్తియా సాసనం సోభేన్తో సీలాలఙ్కారపటిమణ్డితో నచిరస్సేవ అరహత్తం పాపుణి.

౧౩. సో పుబ్బకమ్మం సరన్తో ‘‘పుబ్బే మయా సుఖేత్తే కుసలం కతం సున్దర’’న్తి సోమనస్సజాతో పుబ్బచరితాపదానం పకాసేన్తో తిస్సస్స ఖో భగవతోతిఆదిమాహ. తత్థ తిస్సోపి భవసమ్పత్తియో దదమానో జాతోతి మాతాపితూహి కతనామవసేన తిస్సో. అథ వా తీహి సరణగమనేహి అస్సాసేన్తో ఓవదన్తో హేతుసమ్పన్నపుగ్గలే సగ్గమోక్ఖద్వయే పతిట్ఠాపేన్తో బుద్ధో జాతోతి తిస్సో. సమాపత్తిగుణాదీహి భగేహి యుత్తోతి భగవా, తస్స తిస్సస్స భగవతో పుబ్బే అహం ఫలం అదాసిన్తి సమ్బన్ధో. నాళికేరఞ్చ పాదాసిన్తి నాళికాకారేన పవత్తం ఫలం నాళికేరం, తఞ్చ ఫలం అదాసిన్తి అత్థో. ఖజ్జకం అభిసమ్మతన్తి ఖాదితబ్బం ఖజ్జకం అభి విసేసేన మధుసక్కరాదీహి సమ్మిస్సం కత్వా నిప్ఫాదితం సున్దరం మధురన్తి సమ్మతం ఞాతం అభిసమ్మతం ఖజ్జకఞ్చ అదాసిన్తి అత్థో. సేసం సువిఞ్ఞేయ్యమేవాతి.

ఖజ్జకదాయకత్థేరఅపదానవణ్ణనా సమత్తా.

౪. దేసపూజకత్థేరఅపదానవణ్ణనా

అత్థదస్సీ తు భగవాతిఆదికం ఆయస్మతో దేసపూజకత్థేరస్స అపదానం. అయమ్పి థేరో పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో అత్థదస్సిస్స భగవతో కాలే కులగేహే నిబ్బత్తో వుద్ధిమన్వాయ సద్ధో పసన్నో బుద్ధమామకో ధమ్మమామకో సఙ్ఘమామకో అహోసి. తదా అత్థదస్సీ భగవా భిక్ఖుసఙ్ఘపరివుతో చన్దో వియ సూరియో వియ చ ఆకాసేన గచ్ఛతి. సో ఉపాసకో భగవతో గతదిసాభాగం గన్ధమాలాదీహి పూజేన్తో అఞ్జలిం పగ్గయ్హ నమస్సమానో అట్ఠాసి.

౧౮. సో తేన పుఞ్ఞేన దేవలోకే నిబ్బత్తో సగ్గసమ్పత్తిం అనుభవిత్వా మనుస్సేసు చ మనుస్ససమ్పత్తిం అనుభవిత్వా ఇమస్మిం బుద్ధుప్పాదే ఏకస్మిం కులే నిబ్బత్తో వుద్ధిప్పత్తో ఉపభోగపరిభోగసమ్పన్నో సత్థు ధమ్మదేసనం సుత్వా పసన్నమానసో ఘరావాసే అనల్లీనో పబ్బజిత్వా వత్తసమ్పన్నో నచిరస్సేవ అరహా హుత్వా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో అత్థదస్సీ తు భగవాతిఆదిమాహ. తం హేట్ఠా వుత్తత్థమేవ. అనిలఞ్జసేతి ‘‘మగ్గో పన్థో పథో పజ్జో, అఞ్జసం వటుమాయన’’న్తి (చూళని. పారాయనత్థుతిగాథానిద్దేస ౧౦౧) పరియాయస్స వుత్తత్తా అనిలస్స వాతస్స అఞ్జసం గమనమగ్గోతి అనిలఞ్జసం, తస్మిం అనిలఞ్జసే, ఆకాసేతి అత్థో. సేసం ఉత్తానత్థమేవాతి.

దేసపూజకత్థేరఅపదానవణ్ణనా సమత్తా.

౫. కణికారఛత్తియత్థేరఅపదానవణ్ణనా

వేస్సభూ నామ సమ్బుద్ధోతిఆదికం ఆయస్మతో కణికారఛత్తియత్థేరస్స అపదానం. అయమ్పి థేరో పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో వేస్సభుస్స భగవతో కాలే కులగేహే నిబ్బత్తో విఞ్ఞుతం పత్తో సద్ధాసమ్పన్నో అహోసి. తస్మిం సమయే వేస్సభూ భగవా వివేకకామో మహావనం పవిసిత్వా నిసీది. అథ సోపి ఉపాసకో కేనచిదేవ కరణీయేన తత్థ గన్త్వా భగవన్తం అగ్గిక్ఖన్ధం వియ జలమానం నిసిన్నం దిస్వా పసన్నమానసో కణికారపుప్ఫం ఓచినిత్వా ఛత్తం కత్వా భగవతో నిసిన్నట్ఠానే వితానం కత్వా పూజేసి, తం భగవతో ఆనుభావేన సత్తాహం అమిలాతం హుత్వా తథేవ అట్ఠాసి. భగవాపి ఫలసమాపత్తిం నిరోధసమాపత్తిఞ్చ సమాపజ్జిత్వా విహాసి, సో తం అచ్ఛరియం దిస్వా సోమనస్సజాతో భగవన్తం వన్దిత్వా అఞ్జలిం పగ్గయ్హ అట్ఠాసి. భగవా సమాపత్తితో వుట్ఠహిత్వా విహారమేవ అగమాసి.

౨౩. సో తేన పుఞ్ఞేన దేవమనుస్సేసు సమ్పత్తియో అనుభవిత్వా ఇమస్మిం బుద్ధుప్పాదే సావత్థియం కులగేహే నిబ్బత్తో వుద్ధిమన్వాయ సద్ధాసమ్పన్నో సత్థు ధమ్మదేసనం సుత్వా ఘరావాసే అనల్లీనో పబ్బజిత్వా వత్తపటిపత్తియా జినసాసనం సోభేన్తో నచిరస్సేవ అరహా హుత్వా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో వేస్సభూ నామ సమ్బుద్ధోతిఆదిమాహ. తత్థ వేస్సభూతి వేస్సే వేస్సజనే భునాతి అభిభవతీతి వేస్సభూ. అథ వా వేస్సే పఞ్చవిధమారే అభిభునాతి అజ్ఝోత్థరతీతి వేస్సభూ. సామంయేవ బుజ్ఝితా సచ్చానీతి సమ్బుద్ధో, నామేన వేస్సభూ నామ సమ్బుద్ధోతి అత్థో. దివావిహారాయ మునీతి దిబ్బతి పకాసేతి తం తం వత్థుం పాకటం కరోతీతి దివా. సూరియుగ్గమనతో పట్ఠాయ యావ అత్థఙ్గమో, తావ పరిచ్ఛిన్నకాలో, విహరణం చతూహి ఇరియాపథేహి పవత్తనం విహారో, దివాయ విహారో దివావిహారో, తస్స దివావిహారాయ లోకజేట్ఠో నరాసభో బుద్ధముని మహావనం ఓగాహిత్వా పవిసిత్వాతి అత్థో. సేసం ఉత్తానత్థమేవాతి.

కణికారఛత్తియత్థేరఅపదానవణ్ణనా సమత్తా.

౬. సప్పిదాయకత్థేరఅపదానవణ్ణనా

ఫుస్సో నామాథ భగవాతిఆదికం ఆయస్మతో సప్పిదాయకత్థేరస్స అపదానం. అయమ్పి పురిమబుద్ధేసు కతాధికారో అనేకేసు భవేసు వివట్టూపనిస్సయాని పుఞ్ఞాని ఉపచినన్తో ఫుస్సస్స భగవతో కాలే కులగేహే నిబ్బత్తో అహోసి. తదా భగవా భిక్ఖుసఙ్ఘపరివుతో వీథియం చరమానో తస్స ఉపాసకస్స గేహద్వారం సమ్పాపుణి. అథ సో ఉపాసకో భగవన్తం దిస్వా పసన్నమానసో వన్దిత్వా పత్తపూరం సప్పితేలం అదాసి, భగవా అనుమోదనం కత్వా పక్కామి. సో తేనేవ సోమనస్సేన యావతాయుకం ఠత్వా తతో చుతో తేన పుఞ్ఞేన దేవలోకే ఉప్పన్నో తత్థ దిబ్బసుఖం అనుభవిత్వా మనుస్సేసు చ నిబ్బత్తో ఉప్పన్నుప్పన్నభవే సప్పితేలమధుఫాణితాదిమధురాహారసమఙ్గీ సుఖం అనుభవిత్వా ఇమస్మిం బుద్ధుప్పాదే సావత్థియం ఏకస్మిం కులే నిబ్బత్తో వుద్ధిప్పత్తో సద్ధో బుద్ధిసమ్పన్నో సత్థు ధమ్మదేసనం సుత్వా పసన్నమానసో పబ్బజిత్వా వత్తసమ్పన్నో నచిరస్సేవ అరహా అహోసి.

౨౮. సో అత్తనో పుబ్బకమ్మం సరిత్వా జాతసోమనస్సో పుబ్బచరితాపదానం పకాసేన్తో ఫుస్సో నామాథ భగవాతిఆదిమాహ. తత్థ ఫుస్సోతి ఫుస్సనక్ఖత్తయోగేన జాతత్తా మాతాపితూహి కతనామధేయ్యేన ఫుస్సో. అథ వా నిబ్బానం ఫుసి పస్సి సచ్ఛి అకాసీతి ఫుస్సో. అథ వా సమతింసపారమితాసత్తతింసబోధిపక్ఖియధమ్మే సకలే చ తేపిటకే పరియత్తిధమ్మే ఫుసి పస్సి అఞ్ఞాసీతి ఫుస్సో. భగ్గవా భగ్యవా యుత్తోతిఆదిపుఞ్ఞకోట్ఠాససమఙ్గితాయ భగవా. ఆహుతీనం పటిగ్గహోతి ఆహుతినో వుచ్చన్తి పూజాసక్కారా, తేసం ఆహుతీనం పటిగ్గహేతుం అరహతీతి ఆహుతీనం పటిగ్గహో. మహాజనం నిబ్బాపేన్తో వీరో ఫుస్సో నామ భగవా వీథియం అథ తదా గచ్ఛతేతి సమ్బన్ధో. సేసం పాకటమేవాతి.

సప్పిదాయకత్థేరఅపదానవణ్ణనా సమత్తా.

౭. యూథికాపుప్ఫియత్థేరఅపదానవణ్ణనా

చన్దభాగానదీతీరేతిఆదికం ఆయస్మతో యూథికాపుప్ఫియత్థేరస్స అపదానం. అయమ్పి ఆయస్మా పురిమమునిన్దేసు కతాధికారో అనేకేసు చ జాతిసతేసు వివట్టూపనిస్సయాని పుఞ్ఞాని ఉపచినన్తో ఫుస్సస్సేవ భగవతో కాలే సుద్దకులే నిబ్బత్తో వుద్ధిప్పత్తో చన్దభాగాయ నదియా తీరే కేనచిదేవ కరణీయేన అనుసోతం చరమానో ఫుస్సం భగవన్తం న్హాయితుకామం అగ్గిక్ఖన్ధం వియ జలమానం దిస్వా సోమనస్సజాతో తత్థ జాతం యూథికాపుప్ఫం ఓచినిత్వా భగవన్తం పూజేసి. భగవా తస్స అనుమోదనమకాసి.

౩౩. సో తత్థ తేన పుఞ్ఞకోట్ఠాసేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో వుద్ధిప్పత్తో భగవతో ధమ్మదేసనం సుత్వా పసన్నమానసో పబ్బజిత్వా వత్తపటిపత్తియా సాసనం సోభేన్తో నచిరస్సేవ అరహా హుత్వా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో చన్దభాగానదీతీరేతిఆదిమాహ. తం సబ్బం ఉత్తానత్థమేవాతి.

యూథికాపుప్ఫియత్థేరఅపదానవణ్ణనా సమత్తా.

౮. దుస్సదాయకత్థేరఅపదానవణ్ణనా

తివరాయం పురే రమ్మేతిఆదికం ఆయస్మతో దుస్సదాయకత్థేరస్స అపదానం. అయమ్పాయస్మా పురిమజినవరేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిద్ధత్థస్స భగవతో కాలే రాజకులే నిబ్బత్తో వుద్ధిప్పత్తకాలే యువరాజభావం పత్వా పాకటో ఏకం జనపదం లభిత్వా తత్రాధిపతిభూతో సకలజనపదవాసినో దానపియవచనఅత్థచరియాసమానత్థతాసఙ్ఖాతేహి చతూహి సఙ్గహవత్థూహి సఙ్గణ్హాతి. తస్మిం సమయే సిద్ధత్థో భగవా తం జనపదం సమ్పాపుణి. అథ సో యువరాజా పణ్ణాకారం లభిత్వా తత్థ సుఖుమవత్థేన భగవన్తం పూజేసి. భగవా తం వత్థం హత్థేన పరామసిత్వా ఆకాసం పక్ఖన్ది. తమ్పి వత్థం భగవన్తమేవ అనుబన్ధి. అథ సో యువరాజా తం అచ్ఛరియం దిస్వా అతీవ పసన్నో అఞ్జలిం పగ్గయ్హ అట్ఠాసి. భగవతో సమ్పత్తసమ్పత్తట్ఠానే సబ్బే జనా తం అచ్ఛరియం దిస్వా అచ్ఛరియబ్భుతచిత్తా అఞ్జలిం పగ్గయ్హ అట్ఠంసు. భగవా విహారమేవ అగమాసి. యువరాజా తేనేవ కుసలకమ్మేన తతో చుతో దేవలోకే ఉప్పన్నో తత్థ దిబ్బసమ్పత్తిం అనుభవిత్వా మనుస్సేసు చక్కవత్తిఆదిసమ్పత్తియో అనుభవిత్వా ఇమస్మిం బుద్ధుప్పాదే విభవసమ్పన్నే ఏకస్మిం కులే నిబ్బత్తో విఞ్ఞుతం పత్తో ఘరావాసం సణ్ఠపేత్వా రతనత్తయే పసన్నో భగవతో ధమ్మదేసనం సుత్వా పటిలద్ధసద్ధో పబ్బజిత్వా వాయమన్తో నచిరస్సేవ అరహా అహోసి.

౩౮. సో ఏకదివసం అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో తివరాయం పురే రమ్మేతిఆదిమాహ. తత్థ తివరనామకే నగరే రమణీయే అహం రాజపుత్తో హుత్వా సిద్ధత్థం భగవన్తం వత్థేన పూజేసిన్తి అత్థో. సేసం సువిఞ్ఞేయ్యమేవాతి.

దుస్సదాయకత్థేరఅపదానవణ్ణనా సమత్తా.

౯. సమాదపకత్థేరఅపదానవణ్ణనా

నగరే బన్ధుమతియాతిఆదికం ఆయస్మతో సమాదపకత్థేరస్స అపదానం. అయమ్పి థేరో పురిమబుద్ధానం సన్తికే కతకుసలసమ్భారో అనేకేసు భవేసు వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే కులగేహే నిబ్బత్తో వుద్ధిమన్వాయ ఘరావాసం సణ్ఠపేత్వా పుఞ్ఞాని కరోన్తో వసమానో సద్ధో పసన్నో బహూ ఉపాసకే సన్నిపాతేత్వా గణజేట్ఠకో హుత్వా ‘‘మాళకం కరిస్సామా’’తి తే సబ్బే సమాదపేత్వా ఏకం మాళకం సమం కారేత్వా పణ్డరపులినం ఓకిరిత్వా భగవతో నియ్యాదేసి. సో తేన పుఞ్ఞేన దేవలోకే ఉప్పన్నో ఛ కామావచరసమ్పత్తియో అనుభవిత్వా మనుస్సేసు చ చక్కవత్తిఆదిసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో భగవతి పసన్నో ధమ్మం సుత్వా పసన్నమానసో సద్ధాజాతో పబ్బజిత్వా సీలసమ్పన్నో వత్తసమ్పన్నో నచిరస్సేవ అరహత్తం పాపుణి.

౪౪. సో అపరభాగే అత్తనో కతకుసలం సరిత్వా సఞ్జాతసోమనస్సో పుబ్బచరితాపదానం పకాసేన్తో నగరే బన్ధుమతియాతిఆదిమాహ. తత్థ బన్ధన్తి ఞాతిగోత్తాదివసేన ఏకసమ్బన్ధా హోన్తి సకలనగరవాసినోతి బన్ధూ, బన్ధూ ఏతస్మిం విజ్జన్తీతి బన్ధుమతీ, తస్సా బన్ధుమతియా నామ నగరే మహాపూగగణో ఉపాసకసమూహో అహోసీతి అత్థో. మాళం కస్సామ సఙ్ఘస్సాతి ఏత్థ మాతి గణ్హాతి సమ్పత్తసమ్పత్తజనానం చిత్తన్తి మాళం, అథ వా సమ్పత్తయతిగణానం చిత్తస్స వివేకకరణే అలన్తి మాళం, మాళమేవ మాళకం, భిక్ఖుసఙ్ఘస్స ఫాసువిహారత్థాయ మాళకం కరిస్సామాతి అత్థో. సేసం పాకటమేవాతి.

సమాదపకత్థేరఅపదానవణ్ణనా సమత్తా.

౧౦. పఞ్చఙ్గులియత్థేరఅపదానవణ్ణనా

తిస్సో నామాసి భగవాతిఆదికం ఆయస్మతో పఞ్చఙ్గులియత్థేరస్స అపదానం. అయమ్పి పురిమబుద్ధేసు కతాధికారే తత్థ తత్థ భవే వివట్టూపనిస్సయాని పుఞ్ఞాని ఉపచినన్తో తిస్సస్స భగవతో కాలే ఏకస్మిం కులే నిబ్బత్తో వుద్ధిమన్వాయ ఘరావాసం సణ్ఠపేత్వా విభవసమ్పన్నో సద్ధో పసన్నో వీథితో విహారం పటిపన్నం భగవన్తం దిస్వా జాతిసుమనాదిఅనేకాని సుగన్ధపుప్ఫాని చన్దనాదీని చ విలేపనాని గాహాపేత్వా విహారం గతో పుప్ఫేహి భగవన్తం పూజేత్వా విలేపనేహి భగవతో సరీరే పఞ్చఙ్గులికం కత్వా వన్దిత్వా పక్కామి.

౫౦. సో తేన పుఞ్ఞేన దేవమనుస్సేసు ఉభయసమ్పత్తియో అనుభవిత్వా ఇమస్మిం బుద్ధుప్పాదే విభవసమ్పన్నే ఏకస్మిం కులే నిబ్బత్తిత్వా వుద్ధిమన్వాయ సత్థు ధమ్మదేసనం సుత్వా పసన్నమానసో పబ్బజిత్వా విపస్సనం వడ్ఢేత్వా నచిరస్సేవ అరహా హుత్వా పుబ్బకమ్మం సరన్తో పచ్చక్ఖతో ఞత్వా ‘‘ఇమం నామ కుసలకమ్మం కత్వా ఈదిసం లోకుత్తరసమ్పత్తిం పత్తోమ్హీ’’తి పుబ్బచరితాపదానం పకాసేన్తో తిస్సో నామాసి భగవాతిఆదిమాహ. తం సబ్బం ఉత్తానత్థమేవాతి.

పఞ్చఙ్గులియత్థేరఅపదానవణ్ణనా సమత్తా.

సత్తరసమవగ్గవణ్ణనా సమత్తా.