౧౮. కుముదవగ్గో
౧. కుముదమాలియత్థేరఅపదానవణ్ణనా
పబ్బతే హిమవన్తమ్హీతిఆదికం ఆయస్మతో కుముదమాలియత్థేరస్స అపదానం. అయమ్పి థేరో పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో అత్థదస్సిస్స భగవతో కాలే హిమవన్తపబ్బతసమీపే జాతస్సరస్స ఆసన్నే రక్ఖసో హుత్వా నిబ్బత్తో అత్థదస్సిం భగవన్తం తత్థ ఉపగతం దిస్వా పసన్నమానసో కుముదపుప్ఫాని ఓచినిత్వా భగవన్తం పూజేసి. భగవా అనుమోదనం కత్వా పక్కామి.
౧. సో తేన పుఞ్ఞేన తతో చవిత్వా దేవలోకం ఉపపన్నో ఛ కామావచరసమ్పత్తియో అనుభవిత్వా మనుస్సేసు చ చక్కవత్తిఆదిసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో వుద్ధిప్పత్తో రతనత్తయే పసన్నో పబ్బజిత్వా వాయమన్తో బ్రహ్మచరియపరియోసానం అరహత్తం పత్వా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పబ్బతే హిమవన్తమ్హీతిఆదిమాహ. తత్థ తత్థజో రక్ఖసో ఆసిన్తి తస్మిం జాతస్సరసమీపే జాతో నిబ్బత్తో రక్ఖసో పరరుధిరమంసఖాదకో నిద్దయో ఘోరరూపో భయానకసభావో మహాబలో మహాథామో కక్ఖళో యక్ఖో ఆసిం అహోసిన్తి అత్థో.
కుముదం పుప్ఫతే తత్థాతి తస్మిం మహాసరే సూరియరంసియా అభావే సతి సాయన్హే మకుళితం కుఞ్చితాకారేన నిప్పభం అవణ్ణం హోతీతి ‘‘కుముద’’న్తి లద్ధనామం పుప్ఫం పుప్ఫతే వికసతీతి అత్థో. చక్కమత్తాని జాయరేతి తాని పుప్ఫాని రథచక్కపమాణాని హుత్వా జాయన్తీతి అత్థో. సేసం సువిఞ్ఞేయ్యమేవాతి.
కుముదమాలియత్థేరఅపదానవణ్ణనా సమత్తా.
౨. నిస్సేణిదాయకత్థేరఅపదానవణ్ణనా
కోణ్డఞ్ఞస్స భగవతోతిఆదికం ఆయస్మతో నిస్సేణిదాయకత్థేరస్స అపదానం. అయమ్పి పురిమజినవరేసు కతాధికారో అనేకాసు జాతీసు వివట్టూపనిస్సయాని పుఞ్ఞాని ఉపచినన్తో కోణ్డఞ్ఞస్స భగవతో కాలే వడ్ఢకికులే నిబ్బత్తో సద్ధో పసన్నో భగవతో ధమ్మదేసనం సుత్వా పసన్నమానసో భగవతో వసనపాసాదస్సారోహనత్థాయ సారకట్ఠమయం నిస్సేణిం కత్వా ఉస్సాపేత్వా ఠపేసి. భగవా తస్స పసాదసంవడ్ఢనత్థాయ పస్సన్తస్సేవ ఉపరిపాసాదం ఆరుహి. సో అతీవ పసన్నో తేనేవ పీతిసోమనస్సేన కాలం కత్వా దేవలోకే నిబ్బత్తో తత్థ దిబ్బసమ్పత్తిం అనుభవిత్వా మనుస్సేసు జాయమానో నిస్సేణిదాననిస్సన్దేన ఉచ్చకులే నిబ్బత్తో మనుస్ససుఖం అనుభవిత్వా ఇమస్మిం బుద్ధుప్పాదే ఏకస్మిం కులే నిబ్బత్తో సత్థు ధమ్మదేసనం సుత్వా సద్ధాజాతో పబ్బజితో నచిరస్సేవ అరహా అహోసి.
౯. సో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో కోణ్డఞ్ఞస్స భగవతోతిఆదిమాహ. తత్థ కోణ్డఞ్ఞస్సాతి కుచ్ఛితో హుత్వా డేతి పవత్తతీతి కోణ్డో, లామకసత్తో, కోణ్డతో అఞ్ఞోతి కోణ్డఞ్ఞో, అలామకో ఉత్తమపురిసోతి అత్థో. అథ వా బ్రాహ్మణగోత్తేసు కోణ్డఞ్ఞగోత్తే ఉప్పన్నత్తా ‘‘కోణ్డఞ్ఞో’’తి గోత్తవసేన తస్స నామం, తస్స కోణ్డఞ్ఞస్స. సేసం పాకటమేవాతి.
నిస్సేణిదాయకత్థేరఅపదానవణ్ణనా సమత్తా.
౩. రత్తిపుప్ఫియత్థేరఅపదానవణ్ణనా
మిగలుద్దో పురే ఆసిన్తిఆదికం ఆయస్మతో రత్తిపుప్ఫియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే నేసాదకులే ఉప్పన్నో మిగవధాయ అరఞ్ఞే విచరమానో తస్స కారుఞ్ఞేన అరఞ్ఞే చరమానం విపస్సిం భగవన్తం దిస్వా పసన్నమానసో పుప్ఫితం రత్తికం నామ పుప్ఫం కుటజపుప్ఫఞ్చ సహ వణ్టేన ఓచినిత్వా సోమనస్సచిత్తేన పూజేసి. భగవా అనుమోదనం కత్వా పక్కామి.
౧౩. సో తేనేవ పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో రతనత్తయే పసన్నో సత్థు ధమ్మదేసనం సుత్వా కామేసు ఆదీనవం దిస్వా పబ్బజిత్వా నచిరస్సేవ అరహత్తం పత్తో అత్తనో పుబ్బకమ్మం సరిత్వా ‘‘నేసాదభూతేన మయా కతకుసలం సున్దర’’న్తి సోమనస్సజాతో పుబ్బచరితాపదానం పకాసేన్తో మిగలుద్దో పురే ఆసిన్తిఆదిమాహ. తత్థ మిగానం లుద్దో సాహసికో మారకోతి మిగలుద్దో, మిగేసు వా లుద్దో లోభీతి మిగలుద్దో, నేసాదో ఆసిం పురేతి అత్థో.
౧౪. రత్తికం పుప్ఫితం దిస్వాతి పదుమపుప్ఫాదీని అనేకాని పుప్ఫాని సూరియరంసిసమ్ఫస్సేన దివా పుప్ఫన్తి రత్తియం మకుళితాని హోన్తి. జాతిసుమనమల్లికాదీని అనేకాని పుప్ఫాని పన రత్తియం పుప్ఫన్తి నో దివా. తస్మా రత్తియం పుప్ఫనతో రత్తిపుప్ఫనామకాని అనేకాని సుగన్ధపుప్ఫాని చ కుటజపుప్ఫాని చ గహేత్వా పూజేసిన్తి అత్థో. సేసం ఉత్తానత్థమేవాతి.
రత్తిపుప్ఫియత్థేరఅపదానవణ్ణనా సమత్తా.
౪. ఉదపానదాయకత్థేరఅపదానవణ్ణనా
విపస్సినో భగవతోతిఆదికం ఆయస్మతో ఉదపానదాయకత్థేరస్స అపదానం. అయమ్పి థేరో పురిమమునివరేసు కతాధికారో అనేకేసు భవేసు కతపుఞ్ఞసఞ్చయో విపస్సిస్స భగవతో కాలే కులగేహే నిబ్బత్తో వుద్ధిప్పత్తో ‘‘పానీయదానం మయా దాతబ్బం, తఞ్చ నిరన్తరం కత్వా పవత్తేతుం వట్టతీ’’తి చిన్తేత్వా ఏకం కూపం ఖనాపేత్వా ఉదకసమ్పత్తకాలే ఇట్ఠకాహి చినాపేత్వా థిరం కత్వా తత్థ ఉట్ఠితేన ఉదకేన పుణ్ణం తం ఉదపానం విపస్సిస్స భగవతో నియ్యాదేసి. భగవా పానీయదానానిసంసదీపకం అనుమోదనం అకాసి. సో తేన పుఞ్ఞేన దేవమనుస్సేసు సంసరన్తో నిబ్బత్తనిబ్బత్తట్ఠానే పోక్ఖరణీఉదపానపానీయాదిసమ్పన్నో సుఖమనుభవిత్వా ఇమస్మిం బుద్ధుప్పాదే ఏకస్మిం కులే నిబ్బత్తో వుద్ధిమన్వాయ సద్ధో పసన్నో పబ్బజిత్వా నచిరస్సేవ అరహా అహోసి.
౧౮. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో విపస్సినో భగవతోతిఆదిమాహ. తత్థ ఉదపానో కతో మయాతి ఉదకం పివన్తి ఏత్థాతి ఉదపానో, కూపపోక్ఖరణీతళాకానమేతం అధివచనం. సో ఉదపానో కూపో విపస్సిస్స భగవతో అత్థాయ కతో ఖనితోతి అత్థో. సేసం ఉత్తానత్థమేవాతి.
ఉదపానదాయకత్థేరఅపదానవణ్ణనా సమత్తా.
౫. సీహాసనదాయకత్థేరఅపదానవణ్ణనా
నిబ్బుతే లోకనాథమ్హీతిఆదికం ఆయస్మతో సీహాసనదాయకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే నిబ్బానాధిగమత్థాయ కతపుఞ్ఞూపచయో పదుముత్తరస్స భగవతో కాలే గహపతికులే నిబ్బత్తో విఞ్ఞుతం పత్తో సత్థు ధమ్మదేసనం సుత్వా రతనత్తయే పసన్నో తస్మిం భగవతి పరినిబ్బుతే సత్తహి రతనేహి ఖచితం సీహాసనం కారాపేత్వా బోధిరుక్ఖం పూజేసి, బహూహి మాలాగన్ధధూపేహి చ పూజేసి.
౨౧. సో తేన పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా సబ్బత్థ పూజితో ఇమస్మిం బుద్ధుప్పాదే సావత్థియం కులగేహే నిబ్బత్తో వుద్ధిప్పత్తో ఘరావాసం వసన్తో సత్థు ధమ్మదేసనం సుత్వా పసన్నమానసో ఞాతివగ్గం పహాయ పబ్బజితో నచిరస్సేవ అరహా హుత్వా పుబ్బూపచితకుసలసమ్భారం సరిత్వా సఞ్జాతసోమనస్సో పుబ్బచరితాపదానం పకాసేన్తో నిబ్బుతే లోకనాథమ్హీతిఆదిమాహ. తత్థ సీహాసనమదాసహన్తి సీహరూపహిరఞ్ఞసువణ్ణరతనేహి ఖచితం ఆసనం సీహాసనం, సీహస్స వా అభీతస్స భగవతో నిసిన్నారహం, సీహం వా సేట్ఠం ఉత్తమం ఆసనన్తి సీహాసనం, తం అహం అదాసిం, బోధిరుక్ఖం పూజేసిన్తి అత్థో. సేసం సువిఞ్ఞేయ్యమేవాతి.
సీహాసనదాయకత్థేరఅపదానవణ్ణనా సమత్తా.
౬. మగ్గదత్తికత్థేరఅపదానవణ్ణనా
అనోమదస్సీ భగవాతిఆదికం ఆయస్మతో మగ్గదత్తికత్థేరస్స అపదానం. అయమ్పాయస్మా పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో అనోమదస్సిస్స భగవతో కాలే కులగేహే నిబ్బత్తో వుద్ధిమన్వాయ ఘరావాసం సణ్ఠపేత్వా వసన్తో అనోమదస్సిం భగవన్తం ఆకాసే చఙ్కమన్తం పాదుద్ధారే పాదుద్ధారచఙ్కమనట్ఠానే పుప్ఫానం వికిరణం అచ్ఛరియఞ్చ దిస్వా పసన్నమానసో పుప్ఫాని ఆకాసే ఉక్ఖిపి, తాని వితానం హుత్వా అట్ఠంసు.
౨౬. సో తేన పుఞ్ఞేన సుగతీసుయేవ సంసరన్తో సబ్బత్థ పూజితో సుఖం అనుభవిత్వా ఇమస్మిం బుద్ధుప్పాదే ఏకస్మిం కులే నిబ్బత్తో కమేన యోబ్బఞ్ఞం పాపుణిత్వా సద్ధాజాతో పబ్బజిత్వా వత్తసమ్పన్నో నచిరస్సేవ అరహత్తం పత్తో చఙ్కమనస్స పూజితత్తా మగ్గదత్తికత్థేరోతి పాకటో. సో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో అనోమదస్సీ భగవాతిఆదిమాహ. దిట్ఠధమ్మసుఖత్థాయాతి ఇమస్మిం అత్తభావే చఙ్కమనేన సరీరసల్లహుకాదిసుఖం పటిచ్చాతి అత్థో. అబ్భోకాసమ్హి చఙ్కమీతి అబ్భోకాసే అఙ్గణట్ఠానే చఙ్కమి, పదవిక్ఖేపం పదసఞ్చారం అకాసీతి అత్థో.
ఉద్ధతే పాదే పుప్ఫానీతి చఙ్కమన్తేన పాదే ఉద్ధతే పదుముప్పలాదీని పుప్ఫాని పథవితో ఉగ్గన్త్వా చఙ్కమే వికిరింసూతి అత్థో. సోభం ముద్ధని తిట్ఠరేతి బుద్ధస్స ముద్ధని సీసే సోభయమానా తాని తిట్ఠన్తీతి అత్థో. సేసం సువిఞ్ఞేయ్యమేవాతి.
మగ్గదత్తికత్థేరఅపదానవణ్ణనా సమత్తా.
౭. ఏకదీపియత్థేరఅపదానవణ్ణనా
పదుముత్తరస్స మునినోతిఆదికం ఆయస్మతో ఏకదీపియత్థేరస్స అపదానం. అయమ్పాయస్మా పురిమజినసేట్ఠేసు కతకుసలసమ్భారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే గహపతికులే నిబ్బత్తో వుద్ధిప్పత్తో సద్ధో పసన్నో భగవతో సలలమహాబోధిమ్హి ఏకపదీపం పూజేసి, థావరం కత్వా నిచ్చమేకపదీపపూజనత్థాయ తేలవట్టం పట్ఠపేసి. సో తేన పుఞ్ఞేన దేవమనుస్సేసు సంసరన్తో సబ్బత్థ జలమానో పసన్నచక్ఖుకో ఉభయసుఖమనుభవిత్వా ఇమస్మిం బుద్ధుప్పాదే సావత్థియం విభవసమ్పన్నే ఏకస్మిం కులే నిబ్బత్తో విఞ్ఞుతం పత్తో రతనత్తయే పసన్నో పబ్బజిత్వా నచిరస్సేవ అరహత్తం పత్తో దీపపూజాయ లద్ధవిసేసాధిగమత్తా ఏకదీపియత్థేరోతి పాకటో.
౩౦. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పదుముత్తరస్స మునినోతిఆదిమాహ. తం సబ్బం ఉత్తానత్థమేవాతి.
ఏకదీపియత్థేరఅపదానవణ్ణనా సమత్తా.
౮. మణిపూజకత్థేరఅపదానవణ్ణనా
ఓరేన హిమవన్తస్సాతిఆదికం ఆయస్మతో మణిపూజకత్థేరస్స అపదానం. అయమ్పి థేరో పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే ఏకస్మిం కులే నిబ్బత్తో ఘరావాసం సణ్ఠపేత్వా తత్థాదీనవం దిస్వా ఘరావాసం పహాయ తాపసపబ్బజ్జం పబ్బజిత్వా హిమవన్తఓరభాగే ఏకిస్సా నదియా సమీపే పణ్ణసాలం కారేత్వా వసన్తో వివేకకామతాయ తస్సానుకమ్పాయ చ తత్థ ఉపగతం పదుముత్తరం భగవన్తం దిస్వా పసన్నమానసో మణిపల్లఙ్కం భగవతో పూజేసి. భగవా తస్స పసాదవడ్ఢనత్థాయ తత్థ నిసీది. సో భియ్యోసోమత్తాయ పసన్నో నిబ్బానాధిగమత్థాయ పత్థనం అకాసి. భగవా అనుమోదనం వత్వా పక్కామి. సో తేన పుఞ్ఞేన దేవమనుస్సేసు సంసరన్తో సబ్బత్థ పూజితో సుఖం అనుభవిత్వా ఇమస్మిం బుద్ధుప్పాదే సావత్థియం విభవసమ్పన్నే కులే నిబ్బత్తో ఘరావాసం వసన్తో ఏకదివసం సత్థు ధమ్మదేసనం సుత్వా పటిలద్ధసద్ధో పబ్బజిత్వా నచిరస్సేవ అరహా అహోసి.
౩౪. సో ఏకదివసం అత్తనా కతకుసలం సరిత్వా సఞ్జాతసోమనస్సో పుబ్బచరితాపదానం పకాసేన్తో ఓరేన హిమవన్తస్సాతిఆదిమాహ. తత్థ ఓరేనాతి హిమవన్తస్స అపరం భాగం విహాయ ఓరేన, భుమ్మత్థే కరణవచనం, ఓరస్మిం దిసాభాగేతి అత్థో. నదికా సమ్పవత్తథాతి అపాకటనామధేయ్యా ఏకా నదీ సంసుట్ఠు పవత్తానీ వహానీ సన్దమానా అహోసీతి అత్థో. తస్సా చానుపఖేత్తమ్హీతి తస్సా నదియా అనుపఖేత్తమ్హి తీరసమీపేతి అత్థో. సయమ్భూ వసతే తదాతి యదా అహం మణిపల్లఙ్కం పూజేసిం, తదా అనాచరియకో హుత్వా సయమేవ బుద్ధభూతో భగవా వసతే విహరతీతి అత్థో.
౩౫. మణిం పగ్గయ్హ పల్లఙ్కన్తి మణిన్తి చిత్తం ఆరాధేతి సోమనస్సం కరోతీతి మణి, అథ వా మాతి పమాణం కరోతి ఆభరణన్తి మణి, అథ వా మరన్తాపి రాజయువరాజాదయో తం న పరిచ్చజన్తి తదత్థాయ సఙ్గామం కరోన్తీతి మణి, తం మణిం మణిమయం పల్లఙ్కం మనోరమం సాధు చిత్తం సుట్ఠు విచిత్తం పగ్గయ్హ గహేత్వా బుద్ధసేట్ఠస్స అభిరోపయిం పూజేసిన్తి అత్థో. సేసం సబ్బం ఉత్తానత్థమేవాతి.
మణిపూజకత్థేరఅపదానవణ్ణనా సమత్తా.
౯. తికిచ్ఛకత్థేరఅపదానవణ్ణనా
నగరే బన్ధుమతియాతిఆదికం ఆయస్మతో తికిచ్ఛకత్థేరస్స అపదానం. అయమ్పాయస్మా పురిమజినవరేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే బన్ధుమతీనగరే వేజ్జకులే నిబ్బత్తో బహుస్సుతో సుసిక్ఖితో వేజ్జకమ్మే ఛేకో బహూ రోగినో తికిచ్ఛన్తో విపస్సిస్స భగవతో ఉపట్ఠాకస్స అసోకనామత్థేరస్స రోగం తికిచ్ఛి. సో తేన పుఞ్ఞేన దేవమనుస్సేసు అపరాపరం సుఖం అనుభవన్తో నిబ్బత్తనిబ్బత్తభవే అరోగో దీఘాయుకో సువణ్ణవణ్ణసరీరో అహోసి.
౩౯. సో ఇమస్మిం బుద్ధుప్పాదే సావత్థియం గహపతికులే నిబ్బత్తో వుద్ధిమన్వాయ సబ్బసిప్పేసు నిప్ఫత్తిం పత్తో అరోగో సుఖితో విభవసమ్పన్నో రతనత్తయే పసన్నో సత్థు ధమ్మదేసనం సుత్వా పటిలద్ధసద్ధో ఘరావాసం పహాయ పబ్బజిత్వా నచిరస్సేవ అరహా హుత్వా పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో నగరే బన్ధుమతియాతిఆదిమాహ. తం సబ్బం హేట్ఠా వుత్తనయత్తా ఉత్తానత్థమేవాతి.
తికిచ్ఛకత్థేరఅపదానవణ్ణనా సమత్తా.
౧౦. సఙ్ఘుపట్ఠాకత్థేరఅపదానవణ్ణనా
వేస్సభుమ్హి భగవతీతిఆదికం ఆయస్మతో సఙ్ఘుపట్ఠాకత్థేరస్స అపదానం. అయమ్పి థేరో పురిమబుద్ధేసు కతకుసలసమ్భారో అనేకేసు భవేసు వివట్టూపనిస్సయాని పుఞ్ఞాని ఉపచినన్తో వేస్సభుస్స భగవతో కాలే తస్సారామికస్స పుత్తో హుత్వా నిబ్బత్తో విఞ్ఞుతం పత్వా సద్ధో పసన్నో విహారేసు ఆరామికకమ్మం కరోన్తో సక్కచ్చం సఙ్ఘం ఉపట్ఠాసి. సో తేనేవ కుసలకమ్మేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే సావత్థియం గహపతికులే నిబ్బత్తో వుద్ధిప్పత్తో విభవసమ్పన్నో సుఖప్పత్తో పాకటో సత్థు ధమ్మదేసనం సుత్వా సాసనే పసన్నో పబ్బజిత్వా వత్తసమ్పన్నో సాసనం సోభయమానో విపస్సనం వడ్ఢేన్తో నచిరస్సేవ సహ పటిసమ్భిదాహి అరహత్తం పత్తో ఛళభిఞ్ఞో పుబ్బే కతకుసలకమ్మవసేన సఙ్ఘుపట్ఠాకత్థేరోతి పాకటో అహోసి.
౪౫. సో ఏకదివసం ‘‘పుబ్బే మయా కిం నామ కమ్మం కత్వా అయం లోకుత్తరసమ్పత్తి లద్ధా’’తి అత్తనో పుబ్బకమ్మం సరిత్వా పచ్చక్ఖతో జానిత్వా సోమనస్సజాతో పుబ్బచరితాపదానం పాకటం కరోన్తో వేస్సభుమ్హి భగవతీతిఆదిమాహ. తత్థ అహోసారామికో అహన్తి అహం వేస్సభుస్స భగవతో సాసనే ఆరామికో అహోసిన్తి అత్థో. సేసం హేట్ఠా వుత్తనయత్తా ఉత్తానత్థత్తా చ సువిఞ్ఞేయ్యమేవాతి.
సఙ్ఘుపట్ఠాకత్థేరఅపదానవణ్ణనా సమత్తా.
అట్ఠారసమవగ్గవణ్ణనా సమత్తా.