౧. బన్ధుజీవకత్థేరఅపదానవణ్ణనా

చన్దంవ విమలం సుద్ధన్తిఆదికం ఆయస్మతో బన్ధుజీవకత్థేరస్స అపదానం. అయమ్పాయస్మా పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిఖిస్స భగవతో కాలే కులగేహే నిబ్బత్తో విఞ్ఞుతం పత్తో ఘరావాసం సణ్ఠపేత్వా వసన్తో సిఖిస్స భగవతో రూపకాయసమ్పత్తిం దిస్వా పసన్నమానసో బన్ధుజీవకపుప్ఫాని గహేత్వా భగవతో పాదమూలే పూజేసి. భగవా తస్స చిత్తప్పసాదవడ్ఢనత్థాయ అనుమోదనమకాసి. సో యావతాయుతం ఠత్వా తేనేవ పుఞ్ఞేన దేవలోకే నిబ్బత్తో ఛ కామావచరసమ్పత్తియో అనుభవిత్వా మనుస్సేసు చ చక్కవత్తిఆదిసమ్పత్తియో అనుభవిత్వా ఇమస్స అమ్హాకం సమ్మాసమ్బుద్ధస్స ఉప్పన్నకాలే గహపతికులే నిబ్బత్తో రూపగ్గయసగ్గప్పత్తో సత్థు ధమ్మదేసనం సుత్వా సద్ధాజాతో గేహం పహాయ పబ్బజితో అరహత్తం పాపుణి.

౧. సో పుబ్బేనివాసఞాణేన పుబ్బే కతకుసలకమ్మం అనుస్సరిత్వా సోమనస్సజాతో పుబ్బచరితాపదానం పకాసేన్తో చన్దంవ విమలం సుద్ధన్తిఆదిమాహ. తత్థ చన్దంవ విమలం సుద్ధన్తి అబ్భా, మహికా, ధుమో, రజో, రాహూతి ఇమేహి ఉపక్కిలేసమలేహి విముత్తం చన్దం ఇవ దియడ్ఢసహస్సుపక్కిలేసమలానం పహీనత్తా విమలం నిక్కిలేసత్తా సుద్ధం పసన్నం సిఖిం సమ్బుద్ధన్తి సమ్బన్ధో. కిలేసకద్దమానం అభావేన అనావిలం. నన్దీభవసఙ్ఖాతాయ బలవస్నేహాయ పరిసమన్తతో ఖీణత్తా నన్దీభవపరిక్ఖీణం. తిణ్ణం లోకేతి లోకత్తయతో తిణ్ణం ఉత్తిణ్ణం అతిక్కన్తం. విసత్తికన్తి విసత్తికం వుచ్చతి తణ్హా, నిత్తణ్హన్తి అత్థో.

౨. నిబ్బాపయన్తం జనతన్తి ధమ్మవస్సం వస్సన్తో జనతం జనసమూహం కిలేసపరిళాహాభావేన నిబ్బాపయన్తం వూపసమేన్తం. సయం సంసారతో తిణ్ణం, సబ్బసత్తే సంసారతో తారయన్తం అతిక్కమేన్తం చతున్నం సచ్చానం ముననతో జాననతో మునిం సిఖిం సమ్బుద్ధన్తి సమ్బన్ధో. వనస్మిం ఝాయమానన్తి ఆరమ్మణూపనిజ్ఝానలక్ఖణూపనిజ్ఝానేహి ఝాయన్తం చిన్తేన్తం చిత్తేన భావేన్తం వనమజ్ఝేతి అత్థో. ఏకగ్గం ఏకగ్గచిత్తం సుసమాహితం సుట్ఠు ఆరమ్మణే ఆహితం ఠపితచిత్తం సిఖిం మునిం దిస్వాతి సమ్బన్ధో.

౩. బన్ధుజీవకపుప్ఫానీతి బన్ధూనం ఞాతీనం జీవకం జీవితనిస్సయం హదయమంసలోహితం బన్ధుజీవకం హదయమంసలోహితసమానవణ్ణం పుప్ఫం బన్ధుజీవకపుప్ఫం గహేత్వా సిఖినో లోకబన్ధునో పూజేసిన్తి అత్థో. సేసం ఉత్తానత్థమేవాతి.

బన్ధుజీవకత్థేరఅపదానవణ్ణనా సమత్తా.