౯. సాలపుప్ఫదాయకత్థేరఅపదానవణ్ణనా

మిగరాజా తదా ఆసిన్తిఆదికం ఆయస్మతో సాలపుప్ఫదాయకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే కతకుసలసఞ్చయో కేనచి కమ్మచ్ఛిద్దేన హిమవన్తే సీహయోనియం నిబ్బత్తో అనేకసీహపరివారో విహాసి. తదా సిఖీ భగవా తస్సానుకమ్పాయ హిమవన్తం అగమాసి. సీహో తం ఉపగతం దిస్వా పసన్నమానసో సాఖాభఙ్గేన సకణ్ణికసాలపుప్ఫం గహేత్వా పూజేసి. భగవా తస్స అనుమోదనం అకాసి.

౬౦. సో తేన పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో విఞ్ఞుతం పత్వా సత్థరి పసన్నో పబ్బజిత్వా అరహత్తం పత్తో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో మిగరాజా తదా ఆసిన్తిఆదిమాహ. తత్థ మరణం గచ్ఛన్తీతి మిగా, అథ వా ఘాసం మగ్గన్తి గవేసన్తీతి మిగా, మిగానం రాజా మిగరాజా. సకలచతుప్పదానం రాజభావే సతిపి గాథాబన్ధసుఖత్థం మిగే ఆదిం కత్వా మిగరాజాతి వుత్తం. యదా భగవన్తం దిస్వా సపుప్ఫం సాలసాఖం భఞ్జిత్వా పూజేసిం, తదా అహం మిగరాజా అహోసిన్తి అత్థో.

౬౨. సకోసం పుప్ఫమాహరిన్తి సకణ్ణికం సాలపుప్ఫం ఆహరిం పూజేసిన్తి అత్థో. సేసం ఉత్తానత్థమేవాతి.

సాలపుప్ఫదాయకత్థేరఅపదానవణ్ణనా సమత్తా.