౧౪. సోభితవగ్గో

౧. సోభితత్థేరఅపదానవణ్ణనా

పదుముత్తరో నామ జినోతిఆదికం ఆయస్మతో సోభితత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే ఏకస్మిం కులగేహే నిబ్బత్తో విఞ్ఞుతం పత్తో ఘరావాసం సణ్ఠపేత్వా ఏకదివసం సత్థారా ధమ్మే దేసియమానే సోమనస్సేన పసన్నమానసో నానప్పకారేహి థోమేసి. సో తేనేవ సోమనస్సేన కాలం కత్వా దేవేసు నిబ్బత్తో తత్థ దిబ్బసుఖం అనుభవిత్వా మనుస్సేసు చ మనుస్ససుఖం అనుభవిత్వా ఇమస్మిం బుద్ధుప్పాదే సావత్థియం కులగేహే నిబ్బత్తో సత్తవస్సికోవ పబ్బజిత్వా నచిరస్సేవ ఛళభిఞ్ఞో అరహా అహోసి.

౧. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పదుముత్తరో నామ జినోతిఆదిమాహ. తం సబ్బం హేట్ఠా వుత్తనయత్తా సువిఞ్ఞేయ్యమేవాతి.

సోభితత్థేరఅపదానవణ్ణనా సమత్తా.

౨. సుదస్సనత్థేరఅపదానవణ్ణనా

విత్థతాయ నదీతీరేతిఆదికం ఆయస్మతో సుదస్సనత్థేరస్స అపదానం. అయమ్పి పురిమజినవరేసు కతాధికారో తత్థ తత్థ భవే కతపుఞ్ఞూపచయో సిఖిస్స భగవతో కాలే కులగేహే నిబ్బత్తో వుద్ధిప్పత్తో ఘరావాసం సణ్ఠపేత్వా వసన్తో విత్థతాయ నామ గఙ్గాయ సమీపే పిలక్ఖుఫలితం పరియేసన్తో తస్సా తీరే నిసిన్నం జలమానఅగ్గిసిఖం ఇవ సిఖిం సమ్మాసమ్బుద్ధం దిస్వా పసన్నమానసో కేతకీపుప్ఫం వణ్టేనేవ ఛిన్దిత్వా పూజేన్తో ఏవమాహ – ‘‘భన్తే, యేన ఞాణేన త్వం ఏవం మహానుభావో సబ్బఞ్ఞుబుద్ధో జాతో, తం ఞాణం అహం పూజేమీ’’తి. అథ భగవా అనుమోదనమకాసి. సో తేన పుఞ్ఞేన దేవమనుస్సేసు జాతో ఉభయసమ్పత్తియో అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో సత్థరి పసన్నో పబ్బజిత్వా నచిరస్సేవ అరహా అహోసి.

౧౦. సో అత్తనో కతకుసలం సరిత్వా సోమనస్సజాతో పుబ్బచరితాపదానం పకాసేన్తో విత్థతాయ నదీతీరేతిఆదిమాహ. తత్థ విత్థతాయాతి విత్థరతి పత్థరతి విత్థిణ్ణా హోతీతి విత్థతా, నదన్తి సద్దం కరోన్తి ఇతా గతా పవత్తాతి నదీ, నదిం తరన్తా ఏతం పత్వా తిణ్ణా నామ హోన్తీతి తీరం, తస్సా విత్థతాయ నదియా తీరే తీరసమీపేతి అత్థో. కేతకిం పుప్ఫితం దిస్వాతి కుచ్ఛితాకారేన గణ్హన్తానం హత్థం కణ్డకో ఛిన్దతి విజ్ఝతీతి కేతం, కేతస్స ఏసా కేతకీపుప్ఫం, తం దిస్వా వణ్టం ఛిన్దిత్వాతి సమ్బన్ధో.

౧౧. సిఖినో లోకబన్ధునోతి సిఖీ వుచ్చతి అగ్గి, సిఖీసదిసా నీలపీతాదిభేదా జలమానా ఛబ్బణ్ణఘనరంసియో యస్స సో సిఖీ, లోకస్స సకలలోకత్తయస్స బన్ధు ఞాతకోతి లోకబన్ధు, తస్స సిఖినో లోకబన్ధునో కేతకీపుప్ఫం వణ్టే ఛిన్దిత్వా పూజేసిన్తి సమ్బన్ధో. సేసం ఉత్తానత్థమేవాతి.

సుదస్సనత్థేరఅపదానవణ్ణనా సమత్తా.

౩. చన్దనపూజనకత్థేరఅపదానవణ్ణనా

చన్దభాగానదీతీరేతిఆదికం ఆయస్మతో చన్దనపూజనకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో అత్థదస్సిస్స భగవతో కాలే హిమవన్తే చన్దభాగానదియా సమీపే కిన్నరయోనియం నిబ్బత్తో పుప్ఫభక్ఖో పుప్ఫనివసనో చన్దనఅగరుఆదీసు గన్ధవిభూసితో హిమవన్తే భుమ్మదేవతా వియ ఉయ్యానకీళజలకీళాదిఅనేకసుఖం అనుభవన్తో వాసం కప్పేసి. తదా అత్థదస్సీ భగవా తస్సానుకమ్పాయ హిమవన్తం గన్త్వా ఆకాసతో ఓరుయ్హ సఙ్ఘాటిం పఞ్ఞాపేత్వా నిసీది. సో కిన్నరో తం భగవన్తం విజ్జోతమానం తత్థ నిసిన్నం దిస్వా పసన్నమానసో సుగన్ధచన్దనేన పూజేసి. తస్స భగవా అనుమోదనం అకాసి.

౧౭. సో తేన పుఞ్ఞేన తేన సోమనస్సేన యావతాయుకం ఠత్వా తతో చుతో దేవలోకే నిబ్బత్తో అపరాపరం ఛ కామావచరసమ్పత్తియో అనుభవిత్వా మనుస్సేసు చక్కవత్తిరజ్జపదేసరజ్జసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో పబ్బజిత్వా నచిరస్సేవ అరహత్తం పత్వా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో చన్దభాగానదీతీరేతిఆదిమాహ. తత్థ చన్దం మనం రుచిం అజ్ఝాసయం ఞత్వా వియ జాతోతి చన్దో. చన్దమణ్డలేన పసన్ననిమ్మలోదకేన ఉభోసు పస్సేసు ముత్తాదలసదిససన్థరధవలపులినతలేన చ సమన్నాగతత్తా చన్దేన భాగా సదిసాతి చన్దభాగా, తస్సా చన్దభాగాయ నదియా తీరే సమీపేతి అత్థో. సేసం సబ్బం హేట్ఠా వుత్తనయత్తా సువిఞ్ఞేయ్యమేవాతి.

చన్దనపూజనకత్థేరఅపదానవణ్ణనా సమత్తా.

అట్ఠమభాణవారవణ్ణనా సమత్తా.

౪. పుప్ఫచ్ఛదనియత్థేరఅపదానవణ్ణనా

సునన్దో నామ నామేనాతిఆదికం ఆయస్మతో పుప్ఫచ్ఛదనియత్థేరస్స అపదానం. అయమ్పి పురిమబుద్ధేసు కతాధికారో అనేకేసు భవేసు వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే బ్రాహ్మణకులే నిబ్బత్తో విఞ్ఞుతం పత్వా సకసిప్పేసు నిప్ఫత్తిం పత్తో మహాభోగో మహాయసో దానాభిరతో అహోసి. ఏకదివసం సో ‘‘సకలజమ్బుదీపే ఇమే యాచకా నామ ‘అహం దానం న లద్ధోస్మీ’తి వత్తుం మా లభన్తూ’’తి మహాదానం సజ్జేసి. తదా పదుముత్తరో భగవా సపరివారో ఆకాసేన గచ్ఛతి. బ్రాహ్మణో తం దిస్వా పసన్నచిత్తో సకసిస్సే పక్కోసాపేత్వా పుప్ఫాని ఆహరాపేత్వా ఆకాసే ఉక్ఖిపిత్వా పూజేసి. తాని సకలనగరం ఛాదేత్వా సత్త దివసాని అట్ఠంసు.

౨౬. సో తేన పుఞ్ఞకమ్మేన దేవమనుస్సేసు సుఖం అనుభవిత్వా ఇమస్మిం బుద్ధుప్పాదే సావత్థియం ఏకస్మిం కులగేహే నిబ్బత్తో సద్ధాజాతో పబ్బజిత్వా ఖురగ్గేయేవ అరహత్తం పత్వా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో సునన్దో నామ నామేనాతిఆదిమాహ. తం హేట్ఠా వుత్తనయత్తా సువిఞ్ఞేయ్యమేవాతి.

పుప్ఫచ్ఛదనియత్థేరఅపదానవణ్ణనా సమత్తా.

౫. రహోసఞ్ఞకత్థేరఅపదానవణ్ణనా

హిమవన్తస్సావిదూరేతిఆదికం ఆయస్మతో రహోసఞ్ఞకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో ఏకస్మిం బుద్ధసుఞ్ఞకాలే మజ్ఝిమదేసే బ్రాహ్మణకులే నిబ్బత్తో వుద్ధిమన్వాయ సకసిప్పేసు నిప్ఫత్తిం పత్వా తత్థ సారం అపస్సన్తో కేవలం ఉదరం పూరేత్వా కోధమదమానాదయో అకుసలేయేవ దిస్వా ఘరావాసం పహాయ హిమవన్తం పవిసిత్వా ఇసిపబ్బజ్జం పబ్బజిత్వా అనేకతాపససతపరివారో వసభపబ్బతసమీపే అస్సమం మాపేత్వా తీణి వస్ససహస్సాని హిమవన్తేయేవ వసమానో ‘‘అహం ఏత్తకానం సిస్సానం ఆచరియోతి సమ్మతో గరుట్ఠానియో గరుకాతబ్బో వన్దనీయో, ఆచరియో మే నత్థీ’’తి దోమనస్సప్పత్తో తే సబ్బే సిస్సే సన్నిపాతేత్వా బుద్ధానం అభావే నిబ్బానాధిగమాభావం పకాసేత్వా సయం ఏకకో రహో వివేకట్ఠానేవ నిసిన్నో బుద్ధస్స సమ్ముఖా నిసిన్నో వియ బుద్ధసఞ్ఞం మనసి కరిత్వా బుద్ధారమ్మణం పీతిం ఉప్పాదేత్వా సాలాయం పల్లఙ్కం ఆభుజిత్వా నిసిన్నో కాలం కత్వా బ్రహ్మలోకే నిబ్బత్తి.

౩౪. సో తత్థ ఝానసుఖేన చిరం వసిత్వా ఇమస్మిం బుద్ధుప్పాదే కులగేహే నిబ్బత్తో కామేసు అనల్లీనో సత్తవస్సికో పబ్బజిత్వా ఖురగ్గేయేవ అరహత్తం పత్వా ఛళభిఞ్ఞో హుత్వా పుబ్బేనివాసఞాణేన అత్తనో పుబ్బకమ్మం సరిత్వా సఞ్జాతసోమనస్సో పుబ్బచరితాపదానం పకాసేన్తో హిమవన్తస్సావిదూరేతిఆదిమాహ. వసభో నామ పబ్బతోతి హిమవన్తపబ్బతం వినా సేసపబ్బతానం ఉచ్చతరభావేన సేట్ఠతరభావేన వసభోతి సఙ్ఖం గతో పబ్బతోతి అత్థో. సేసం సబ్బత్థ ఉత్తానత్థమేవాతి.

రహోసఞ్ఞకత్థేరఅపదానవణ్ణనా సమత్తా.

౬. చమ్పకపుప్ఫియత్థేరఅపదానవణ్ణనా

కణికారంవ జోతన్తన్తిఆదికం ఆయస్మతో చమ్పకపుప్ఫియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో వేస్సభుస్స భగవతో కాలే బ్రాహ్మణకులే నిబ్బత్తో వుద్ధిప్పత్తో సకసిప్పేసు నిప్ఫత్తిం పత్వా తత్థ సారం అపస్సన్తో ఘరావాసం పహాయ తాపసపబ్బజ్జం పబ్బజిత్వా వనన్తరే వసన్తో వేస్సభుం భగవన్తం ఉద్దిస్స సిస్సేహి ఆనీతేహి చమ్పకపుప్ఫేహి పూజేసి. భగవా అనుమోదనం అకాసి. సో తేనేవ కుసలేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పాపుణిత్వా పుబ్బవాసనాబలేన ఘరావాసే అనల్లీనో పబ్బజిత్వా నచిరస్సేవ అరహా అహోసి.

౪౧. సో అపరభాగే అత్తనో పుబ్బపుఞ్ఞకమ్మం సరిత్వా సోమనస్సజాతో పుబ్బచరితాపదానం పకాసేన్తో కణికారంవ జోతన్తన్తిఆదిమాహ. తత్థ కణికారన్తి సకలపత్తపలాసాని పరిభజ్జ పాతేత్వా పుప్ఫగహణసమయే కణ్ణికాబద్ధో హుత్వా పుప్ఫమకుళానం గహణతో కణ్ణికాకారేన పకతోతి కణికారో, ‘‘కణ్ణికారో’’తి వత్తబ్బే నిరుత్తినయేన ఏకస్స పుబ్బ ణ-కారస్స లోపం కత్వా ‘‘కణికార’’న్తి వుత్తన్తి దట్ఠబ్బం. తం పుప్ఫితం కణికారరుక్ఖం ఇవ జోతన్తం బుద్ధం అద్దసన్తి అత్థో. సేసం ఉత్తానత్థమేవాతి.

చమ్పకపుప్ఫియత్థేరఅపదానవణ్ణనా సమత్తా.

౭. అత్థసన్దస్సకత్థేరఅపదానవణ్ణనా

విసాలమాళే ఆసీనోతిఆదికం ఆయస్మతో అత్థసన్దస్సకత్థేరస్స అపదానం. అయమ్పి పురిమబుద్ధేసు కతాధికారో అనేకేసు అత్తభావేసు కతపుఞ్ఞూపచయో పదుముత్తరస్స భగవతో కాలే బ్రాహ్మణకులే నిబ్బత్తో వుద్ధిమన్వాయ సకసిప్పేసు నిప్ఫత్తిం పత్తో తత్థ సారం అపస్సన్తో గేహం పహాయ హిమవన్తం గన్త్వా రమణీయే ఠానే పణ్ణసాలం కత్వా పటివసతి, తదా సత్తానుకమ్పాయ హిమవన్తమాగతం పదుముత్తరభగవన్తం దిస్వా పసన్నమానసో పఞ్చఙ్గసమన్నాగతో వన్దిత్వా థుతివచనేహి థోమేసి. సో తేన పుఞ్ఞేన యావతాయుకం కత్వా కాలఙ్కత్వా బ్రహ్మలోకూపగో అహోసి. సో అపరభాగే ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో సత్థు ధమ్మదేసనం సుత్వా పటిలద్ధసద్ధో పబ్బజిత్వా అరహత్తం పాపుణి.

౪౭. సో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో విసాలమాళే ఆసీనోతిఆదిమాహ. తత్థ విసాలమాళేతి విసాలం పత్థటం విత్థిణ్ణం మహన్తం మాళం విసాలమాళం, తస్మిం విసాలమాళే ఆసీనో నిసిన్నో అహం లోకనాయకం అద్దసన్తి సమ్బన్ధో. తేసం సువిఞ్ఞేయ్యమేవాతి.

అత్థసన్దస్సకత్థేరఅపదానవణ్ణనా సమత్తా.

౮. ఏకపసాదనియత్థేరఅపదానవణ్ణనా

నారదో ఇతి మే నామన్తిఆదికం ఆయస్మతో ఏకపసాదనియత్థేరస్స అపదానం. అయమ్పి పురిమబుద్ధేసు కతాధికారో అనేకాసు జాతీసు కతకుసలో అత్థదస్సిస్స భగవతో కాలే బ్రాహ్మణకులే నిబ్బత్తో కేసవోతి పాకటో హుత్వా విఞ్ఞుతం పత్వా ఘరావాసం పహాయ పబ్బజిత్వా వసన్తో ఏకదివసం సత్థు ధమ్మదేసనం సుత్వా పసన్నమానసో అఞ్జలిం పగ్గయ్హ అతివియ పీతిసోమనస్సజాతో పక్కామి. సో యావతాయుకం ఠత్వా తేనేవ సోమనస్సేన కాలం కత్వా దేవేసు నిబ్బత్తో తత్థ దిబ్బసమ్పత్తిం అనుభవిత్వా మనుస్సేసు ఉప్పన్నో తత్థ సమ్పత్తియో అనుభవిత్వా ఇమస్మిం బుద్ధుప్పాదే అఞ్ఞతరస్మిం కులగేహే నిబ్బత్తో వుద్ధిప్పత్తో సత్థరి పసీదిత్వా పబ్బజితో నచిరస్సేవ అరహా అహోసి.

౫౫. సో అపరభాగే అత్తనో కతకుసలకమ్మం సరిత్వా సోమనస్సజాతో పుబ్బచరితాపదానం పకాసేన్తో నారదో ఇతి మే నామన్తిఆదిమాహ. తత్థ నారదోతి జాతివసేన సుద్ధసరీరత్తా నత్థి రజో ధూలి మలం ఏతస్సాతి నారదో, జ-కారస్స ద-కారం కత్వా నారదోతి కులదత్తికం నామం. కేసవోతి కిసవచ్ఛగోత్తే జాతత్తా కేసవో నారదకేసవో ఇతి మం జనా విదూ జానన్తీతి అత్థో. సేసం పాకటమేవాతి.

ఏకపసాదనియత్థేరఅపదానవణ్ణనా సమత్తా.

౯. సాలపుప్ఫదాయకత్థేరఅపదానవణ్ణనా

మిగరాజా తదా ఆసిన్తిఆదికం ఆయస్మతో సాలపుప్ఫదాయకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే కతకుసలసఞ్చయో కేనచి కమ్మచ్ఛిద్దేన హిమవన్తే సీహయోనియం నిబ్బత్తో అనేకసీహపరివారో విహాసి. తదా సిఖీ భగవా తస్సానుకమ్పాయ హిమవన్తం అగమాసి. సీహో తం ఉపగతం దిస్వా పసన్నమానసో సాఖాభఙ్గేన సకణ్ణికసాలపుప్ఫం గహేత్వా పూజేసి. భగవా తస్స అనుమోదనం అకాసి.

౬౦. సో తేన పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో విఞ్ఞుతం పత్వా సత్థరి పసన్నో పబ్బజిత్వా అరహత్తం పత్తో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో మిగరాజా తదా ఆసిన్తిఆదిమాహ. తత్థ మరణం గచ్ఛన్తీతి మిగా, అథ వా ఘాసం మగ్గన్తి గవేసన్తీతి మిగా, మిగానం రాజా మిగరాజా. సకలచతుప్పదానం రాజభావే సతిపి గాథాబన్ధసుఖత్థం మిగే ఆదిం కత్వా మిగరాజాతి వుత్తం. యదా భగవన్తం దిస్వా సపుప్ఫం సాలసాఖం భఞ్జిత్వా పూజేసిం, తదా అహం మిగరాజా అహోసిన్తి అత్థో.

౬౨. సకోసం పుప్ఫమాహరిన్తి సకణ్ణికం సాలపుప్ఫం ఆహరిం పూజేసిన్తి అత్థో. సేసం ఉత్తానత్థమేవాతి.

సాలపుప్ఫదాయకత్థేరఅపదానవణ్ణనా సమత్తా.

౧౦. పియాలఫలదాయకత్థేరఅపదానవణ్ణనా

పరోధకో తదా ఆసిన్తిఆదికం ఆయస్మతో పియాలఫలదాయకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిఖిస్స భగవతో కాలే నేసాదకులే నిబ్బత్తో హిమవన్తే ఏకస్మిం పబ్భారే మిగే వధిత్వా జీవికం కప్పేత్వా వసతి. తస్మిం కాలే తత్థ గతం సిఖిం భగవన్తం దిస్వా పసన్నమానసో సాయం పాతం నమస్సమానో కఞ్చి దేయ్యధమ్మం అపస్సన్తో మధురాని పియాలఫలాని ఉచ్చినిత్వా అదాసి. భగవా తాని పరిభుఞ్జి. సో నేసాదో బుద్ధారమ్మణాయ పీతియా నిరన్తరం ఫుట్ఠసరీరో పాపకమ్మే విరత్తచిత్తో మూలఫలాహారో నచిరస్సేవ కాలం కత్వా దేవలోకే నిబ్బత్తి.

౬౬. సో తత్థ దిబ్బసమ్పత్తియో అనుభవిత్వా మనుస్సేసు చ అనేకవిధసమ్పత్తియో అనుభవిత్వా ఇమస్మిం బుద్ధుప్పాదే గహపతికులే నిబ్బత్తో విఞ్ఞుతం పత్తో ఘరావాసం సణ్ఠపేత్వా తత్థ అనభిరతో గేహం పహాయ సత్థు సన్తికే పబ్బజిత్వా విపస్సనం వడ్ఢేత్వా నచిరస్సేవ అరహత్తం పత్తో అత్తనో కతఫలదానకమ్మం సరిత్వా సోమనస్సజాతో పుబ్బచరితాపదానం పకాసేన్తో పరోధకో తదా ఆసిన్తిఆదిమాహ. తత్థ యదా అహం పియాలఫలం దత్వా చిత్తం పసాదేసిం, తదా అహం పరోధకో ఆసిన్తి సమ్బన్ధో. పరోధకోతి పరసత్తరోధకో విహేసకో. ‘‘పరరోధకో’’తి వత్తబ్బే పుబ్బస్స ర-కారస్స లోపం కత్వా ‘‘పరోధకో’’తి వుత్తం.

౬౯. పరిచారిం వినాయకన్తి తం నిబ్బానపాపకం సత్థారం, ‘‘భన్తే, ఇమం ఫలం పరిభుఞ్జథా’’తి పవారిం నిమన్తేసిం ఆరాధేసిన్తి అత్థో. సేసం సువిఞ్ఞేయ్యమేవాతి.

పియాలఫలదాయకత్థేరఅపదానవణ్ణనా సమత్తా.

చుద్దసమవగ్గవణ్ణనా సమత్తా.