౧౫. ఛత్తవగ్గో

౧. అతిఛత్తియత్థేరఅపదానవణ్ణనా

పరినిబ్బుతే భగవతీతిఆదికం ఆయస్మతో అతిఛత్తియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో అత్థదస్సిస్స భగవతో కాలే ఏకస్మిం కులగేహే నిబ్బత్తో ధరమానస్స భగవతో అదిట్ఠత్తా పరినిబ్బుతకాలే ‘‘అహో మమ పరిహానీ’’తి చిన్తేత్వా ‘‘మమ జాతిం సఫలం కరిస్సామీ’’తి కతసన్నిట్ఠానో ఛత్తాధిఛత్తం కారేత్వా తస్స భగవతో సరీరధాతుం నిహితధాతుగబ్భం పూజేసి. అపరభాగే పుప్ఫచ్ఛత్తం కారేత్వా తమేవ ధాతుగబ్భం పూజేసి. సో తేనేవ పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే గహపతికులే నిబ్బత్తో విఞ్ఞుతం పత్తో సత్థరి పసన్నో పబ్బజిత్వా కమ్మట్ఠానం గహేత్వా వాయమన్తో నచిరస్సేవ అరహత్తం పాపుణి.

౧. సో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పరినిబ్బుతే భగవతీతిఆదిమాహ. తత్థ ఛత్తాతిఛత్తన్తి ఛాదియతి సంవరియతి ఆతపాదిన్తి ఛత్తం, ఛత్తస్స అతిఛత్తం ఛత్తస్స ఉపరి కతఛత్తం ఛత్తాతిఛత్తం, ఛత్తస్స ఉపరూపరి ఛత్తన్తి అత్థో. థూపమ్హి అభిరోపయిన్తి థూపియతి రాసికరీయతీతి థూపో, అథ వా థూపతి థిరభావేన వుద్ధిం విరూళ్హిం వేపుల్లం ఆపజ్జమానో పతిట్ఠాతీతి థూపో, తస్మిం థూపమ్హి మయా కారితం ఛత్తం ఉపరూపరి ఠపనవసేన అభి విసేసేన ఆరోపయిం పూజేసిన్తి అత్థో.

౨. పుప్ఫచ్ఛదనం కత్వానాతి వికసితేహి సుగన్ధేహి అనేకేహి ఫుప్ఫేహి ఛదనం ఛత్తుపరి వితానం కత్వా పూజేసిన్తి అత్థో. సేసం సబ్బత్థ ఉత్తానత్థమేవాతి.

అతిఛత్తియత్థేరఅపదానవణ్ణనా సమత్తా.

౨. థమ్భారోపకత్థేరఅపదానవణ్ణనా

నిబ్బుతే లోకనాథమ్హీతిఆదికం ఆయస్మతో థమ్భారోపకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో ధమ్మదస్సిస్స భగవతో కాలే కులగేహే నిబ్బత్తో సద్ధో పసన్నో పరినిబ్బుతే భగవతి తస్స భగవతో ధాతుగబ్భమాళకే థమ్భం నిఖనిత్వా ధజం ఆరోపేసి. బహూని జాతిసుమనపుప్ఫాని గన్థిత్వా నిస్సేణియా ఆరోహిత్వా పూజేసి.

౫. సో యావతాయుకం ఠత్వా కాలం కత్వా దేవమనుస్సేసు సంసరన్తో ఉభయసమ్పత్తియో అనుభవిత్వా సబ్బత్థ పూజితో ఇమస్మిం బుద్ధుప్పాదే ఏకస్మిం కులగేహే నిబ్బత్తో దహరకాలతో పభుతి పూజనీయో సాసనే బద్ధసద్ధో పబ్బజిత్వా సహ పటిసమ్భిదాహి అరహత్తం పత్తో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో నిబ్బుతే లోకనాథమ్హీతిఆదిమాహ. తత్థ నిబ్బుతే లోకనాథమ్హీతి సకలలోకస్స నాథే పధానభూతే పటిసరణే చ సత్థరి ఖన్ధపరినిబ్బానేన నిబ్బుతే నిబ్బుతదీపసిఖా వియ అదస్సనం గతేతి అత్థో. ధమ్మదస్సీనరాసభేతి చతుసచ్చధమ్మం పస్సతీతి ధమ్మదస్సీ, అథ వా సతిపట్ఠానాదికే సత్తతింసబోధిపక్ఖియధమ్మే దస్సనసీలో పస్సనసీలోతి ధమ్మదస్సీ, నరానం ఆసభో పవరో ఉత్తమోతి నరాసభో, ధమ్మదస్సీ చ సో నరాసభో చేతి ధమ్మదస్సీనరాసభో, తస్మిం ధమ్మదస్సీనరాసభే. ఆరోపేసిం ధజం థమ్భన్తి చేతియమాళకే థమ్భం నిఖనిత్వా తత్థ ధజం ఆరోపేసిం బన్ధిత్వా ఠపేసిన్తి అత్థో.

౬. నిస్సేణిం మాపయిత్వానాతి నిస్సాయ తం ఇణన్తి గచ్ఛన్తి ఆరోహన్తి ఉపరీతి నిస్సేణి, తం నిస్సేణిం మాపయిత్వా కారేత్వా బన్ధిత్వా థూపసేట్ఠం సమారుహిన్తి సమ్బన్ధో. జాతిపుప్ఫం గహేత్వానాతి జాయమానమేవ జనానం సున్దరం మనం కరోతీతి జాతిసుమనం, జాతిసుమనమేవ పుప్ఫం ‘‘జాతిసుమనపుప్ఫ’’న్తి వత్తబ్బే గాథాబన్ధసుఖత్థం సుమనసద్దస్స లోపం కత్వా ‘‘జాతిపుప్ఫ’’న్తి వుత్తం, తం జాతిసుమనపుప్ఫం గహేత్వా గన్థిత్వా థూపమ్హి ఆరోపయిం, ఆరోపేత్వా పూజేసిన్తి అత్థో. సేసం సువిఞ్ఞేయ్యమేవాతి.

థమ్భారోపకత్థేరఅపదానవణ్ణనా సమత్తా.

౩. వేదికారకత్థేరఅపదానవణ్ణనా

నిబ్బుతే లోకనాథమ్హీతిఆదికం ఆయస్మతో వేదికారకత్థేరస్స అపదానం. అయమ్పి పురిమజినవరేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పియదస్సిస్స భగవతో కాలే విభవసమ్పన్నే ఏకస్మిం కులే నిబ్బత్తో విఞ్ఞుతం పత్వా ఘరావాసం సణ్ఠపేత్వా నిబ్బుతే సత్థరి పసన్నో తస్స చేతియే వలయం కారేసి, సత్తహి రతనేహి పరిపూరేత్వా మహాపూజం కారేసి. సో తేన పుఞ్ఞేన దేవమనుస్సేసు సంసరన్తో అనేకేసు జాతిసతసహస్సేసు పూజనీయో మహద్ధనో మహాభోగో ఉభయసుఖం అనుభవిత్వా ఇమస్మిం బుద్ధుప్పాదే కులగేహే నిబ్బత్తో విభవసమ్పన్నో పబ్బజిత్వా వాయమన్తో నచిరస్సేవ అరహా అహోసి.

౧౦. సో ఏకదివసం అత్తనో పుబ్బే కతకుసలం సరిత్వా సోమనస్సజాతో పుబ్బచరితాపదానం పకాసేన్తో నిబ్బుతే లోకనాథమ్హీతిఆదిమాహ. తం హేట్ఠా వుత్తత్థమేవ. పియదస్సీనరుత్తమేతి పియం సోమనస్సాకారం దస్సనం యస్స సో పియదస్సీ, ఆరోహపరిణాహద్వత్తింసమహాపురిసలక్ఖణఅసీతానుబ్యఞ్జనబ్యామప్పభామణ్డలేహి సాధు మహాజనప్పసాదం జనయనాకారదస్సనోతి అత్థో. నరానం ఉత్తమోతి నరుత్తమో, పియదస్సీ చ సో నరుత్తమో చేతి పియదస్సీనరుత్తమో, తస్మిం పియదస్సీనరుత్తమే నిబ్బుతే ధాతుగబ్భమ్హి ముత్తవేదిం అహం అకాసిన్తి సమ్బన్ధో. పుప్ఫాధారత్థాయ పరియోసానే వేదికావలయం అకాసిన్తి అత్థో.

౧౧. మణీహి పరివారేత్వాతి మణతి జోతతి పభాసతీతి మణి, అథ వా జనానం మనం పూరేన్తో సోమనస్సం కరోన్తో ఇతో గతో పవత్తోతి మణి, జాతిరఙ్గమణివేళురియమణిఆదీహి అనేకేహి మణీహి కతవేదికావలయం పరివారేత్వా ఉత్తమం మహాపూజం అకాసిన్తి అత్థో. సేసం ఉత్తానత్థమేవాతి.

వేదికారకత్థేరఅపదానవణ్ణనా సమత్తా.

౪. సపరివారియత్థేరఅపదానవణ్ణనా

పదుముత్తరో నామ జినోతిఆదికం ఆయస్మతో సపరివారియత్థేరస్స అపదానం. అయమ్పి పురిమబుద్ధేసు కతాధికారో అనేకాసు జాతీసు వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే కులగేహే నిబ్బత్తో విఞ్ఞుతం పత్తో మహద్ధనో మహాభోగో అహోసి. అథ పదుముత్తరే భగవతి పరినిబ్బుతే మహాజనో తస్స ధాతుం నిదహిత్వా మహన్తం చేతియం కారేత్వా పూజేసి. తస్మిం కాలే అయం ఉపాసకో తస్సుపరి చన్దనసారేన చేతియఘరం కరిత్వా మహాపూజం అకాసి. సో తేనేవ పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో వుద్ధిమన్వాయ కుసలం కత్వా సద్ధాయ సాసనే పబ్బజిత్వా నచిరస్సేవ అరహా అహోసి.

౧౫-౮. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పదుముత్తరో నామ జినోతిఆదిమాహ. తత్థ ఓమత్తన్తి లామకభావం నీచభావం దుక్ఖితభావం వా న పస్సామి న జానామి, న దిట్ఠపుబ్బో మయా నీచభావోతి అత్థో. సేసం పాకటమేవాతి.

సపరివారియత్థేరఅపదానవణ్ణనా సమత్తా.

౫. ఉమాపుప్ఫియత్థేరఅపదానవణ్ణనా

నిబ్బుతే లోకమహితేతిఆదికం ఆయస్మతో ఉమాపుప్ఫియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిద్ధత్థస్స భగవతో కాలే కులగేహే నిబ్బత్తో వుద్ధిప్పత్తో ఘరావాసం సణ్ఠపేత్వా వసన్తో నిబ్బుతస్స భగవతో చేతియమహే వత్తమానే ఇన్దనీలమణివణ్ణం ఉమాపుప్ఫం గహేత్వా పూజేసి. సో తేన పుఞ్ఞేన సుగతీసుయేవ సంసరన్తో దిబ్బమానుససమ్పత్తియో అనుభవిత్వా ఉప్పన్నుప్పన్నభవే బహులం నీలవణ్ణో జాతిసమ్పన్నో విభవసమ్పన్నో అహోసి. సో ఇమస్మిం బుద్ధుప్పాదే విభవసమ్పన్నే ఏకస్మిం కులగేహే నిబ్బత్తో విఞ్ఞుతం పత్వా సద్ధాజాతో పబ్బజితో నచిరస్సేవ అరహత్తం పాపుణి.

౨౧. సో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో నిబ్బుతే లోకమహితేతిఆది వుత్తం. తత్థ లోకమహితేతి లోకేహి మహితో పూజితోతి లోకమహితో, తస్మిం లోకమహితే సిద్ధత్థమ్హి భగవతి పరినిబ్బుతేతి సమ్బన్ధో. ఆహుతీనంపటిగ్గహేతి ఆహుతినో వుచ్చన్తి పూజాసక్కారా, తేసం ఆహుతీనం పటిగ్గహేతుం అరహతీతి ఆహుతీనంపటిగ్గహో, అలుత్తకితన్తసమాసో, తస్మిం ఆహుతీనంపటిగ్గహే భగవతి పరినిబ్బుతేతి అత్థో.

౨౨. ఉమాపుప్ఫన్తి ఉద్ధముద్ధం నీలపభం ముఞ్చమానం పుప్ఫతి వికసతీతి ఉమాపుప్ఫం, తం ఉమాపుప్ఫం గహేత్వా చేతియే పూజం అకాసిన్తి అత్థో. సేసం ఉత్తానత్థమేవాతి.

ఉమాపుప్ఫియత్థేరఅపదానవణ్ణనా సమత్తా.

౬. అనులేపదాయకత్థేరఅపదానవణ్ణనా

అనోమదస్సీమునినోతిఆదికం ఆయస్మతో అనులేపదాయకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో అనోమదస్సిస్స భగవతో కాలే కులగేహే నిబ్బత్తో మహద్ధనో మహాభోగో తస్స భగవతో బోధిరుక్ఖస్స వేదికావలయం కారేత్వా సుధాకమ్మఞ్చ కారేత్వా వాలుకసన్థరణం దద్దళ్హమానం రజతవిమానమివ కారేసి. సో తేన పుఞ్ఞేన సుఖప్పత్తో ఉప్పన్నుప్పన్నభవే రజతవిమానరజతగేహరజతపాసాదేసు సుఖమనుభవిత్వా ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్వా సత్థరి పసన్నో పబ్బజిత్వా విపస్సనమనుయుత్తో నచిరస్సేవ అరహా అహోసి.

౨౬. సో అపరభాగే ‘‘కిం ను ఖో కుసలం కత్వా మయా అయం విసేసో అధిగతో’’తి పుబ్బేనివాసానుస్సతిఞాణేన పటిపాటియా అనుస్సరిత్వా పుబ్బే కతకుసలం జానిత్వా సోమనస్సజాతో పుబ్బచరితాపదానం పకాసేన్తో అనోమదస్సీమునినోతిఆదిమాహ. తత్థ అనోమం అలామకం దస్సనం దస్సనీయం సరీరం యస్స సో అనోమదస్సీ, ద్వత్తింసమహాపురిసలక్ఖణఅసీతానుబ్యఞ్జనబ్యామప్పభాసముజ్జలవిరాజితసరీరత్తా సున్దరదస్సనోతి అత్థో. సుధాయ పిణ్డం దత్వానాతి బోధిఘరే వేదికావలయం కారేత్వా సకలే బోధిఘరే సుధాలేపనం కత్వాతి అత్థో. పాణికమ్మం అకాసహన్తి సారకట్ఠేన ఫలకపాణియో కత్వా తాహి పాణీహి మట్ఠకమ్మం అకాసిన్తి అత్థో. సేసం సువిఞ్ఞేయ్యమేవాతి.

అనులేపదాయకత్థేరఅపదానవణ్ణనా సమత్తా.

౭. మగ్గదాయకత్థేరఅపదానవణ్ణనా

ఉత్తరిత్వాన నదికన్తిఆదికం ఆయస్మతో మగ్గదాయకత్థేరస్స అపదానం. అయమ్పి పురిమజినవరేసు కతాధికారో అనేకేసు భవేసు నిబ్బానాధిగమత్థాయ పుఞ్ఞాని ఉపచినన్తో సిద్ధత్థస్స భగవతో కాలే లోకసమ్మతే కులే నిబ్బత్తో వుద్ధిమన్వాయ ఘరావాసం వసన్తో ఏకదివసం భగవన్తం ఏకం నదిం ఉత్తరిత్వా వనన్తరం గచ్ఛన్తం దిస్వా పసన్నమానసో ‘‘ఇదాని మయా భగవతో మగ్గం సమం కాతుం వట్టతీ’’తి చిన్తేత్వా కుదాలఞ్చ పిటకఞ్చ ఆదాయ భగవతో గమనమగ్గం సమం కత్వా వాలుకం ఓకిరిత్వా భగవతో పాదే వన్దిత్వా, ‘‘భన్తే, ఇమినా మగ్గాలఙ్కారకరణేన నిబ్బత్తనిబ్బత్తట్ఠానే పూజనీయో భవేయ్యం, నిబ్బానఞ్చ పాపుణేయ్య’’న్తి పత్థనం అకాసి. భగవా ‘‘యథాధిప్పాయం సమిజ్ఝతూ’’తి అనుమోదనం వత్వా పక్కామి.

౩౨-౩. సో తేన పుఞ్ఞేన దేవమనుస్సేసు సంసరన్తో సబ్బత్థ పూజితో అహోసి. ఇమస్మిం పన బుద్ధుప్పాదే పాకటే ఏకస్మిం కులే నిబ్బత్తో సత్థరి పసన్నో పబ్బజిత్వా విపస్సనం వడ్ఢేత్వా నచిరస్సేవ అరహత్తం పత్వా అత్తనో పుబ్బకమ్మం పచ్చక్ఖతో ఞత్వా సోమనస్సజాతో పుబ్బచరితాపదానం పకాసేన్తో ఉత్తరిత్వాన నదికన్తిఆదిమాహ. తత్థ నదతి సద్దం కరోతి గచ్ఛతీతి నదీ, నదీయేవ నదికా, తం నదికం ఉత్తరిత్వా అతిక్కమిత్వాతి అత్థో. కుదాలపిటకమాదాయాతి కు వుచ్చతి పథవీ, తం విదాలనే పదాలనే ఛిన్దనే అలన్తి కుదాలం, పిటకం వుచ్చతి పంసువాలికాదివాహకం, తాలపణ్ణవేత్తలతాదీహి కతభాజనం, కుదాలఞ్చ పిటకఞ్చ కుదాలపిటకం, తం ఆదాయ గహేత్వాతి అత్థో. సేసం ఉత్తానత్థమేవాతి.

మగ్గదాయకత్థేరఅపదానవణ్ణనా సమత్తా.

౮. ఫలకదాయకత్థేరఅపదానవణ్ణనా

యానకారో పురే ఆసిన్తిఆదికం ఆయస్మతో ఫలకదాయకత్థేరస్స అపదానం. అయమ్పి పురిమబుద్ధేసు కతాధికారో అనేకేసు అత్తభావేసు కతపుఞ్ఞసమ్భారో సిద్ధత్థస్స భగవతో కాలే వడ్ఢకికులే నిబ్బత్తో రతనత్తయే పసన్నో చన్దనేన ఆలమ్బనఫలకం కత్వా భగవతో అదాసి. భగవా తస్సానుమోదనం అకాసి.

౩౭. సో తేన పుఞ్ఞేన దేవమనుస్సేసు సంసరన్తో సబ్బత్థ కాలే చిత్తసుఖపీణితో ఉభయసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్వా సత్థు ధమ్మదేసనం సుత్వా సఞ్జాతప్పసాదో పబ్బజిత్వా వాయమన్తో నచిరస్సేవ సహ పటిసమ్భిదాహి అరహత్తం పత్వా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో యానకారో పురే ఆసిన్తిఆదిమాహ. తత్థ యానకారోతి యన్తి ఏతేన ఇచ్ఛితిచ్ఛితట్ఠానన్తి యానం, తం కరోతీతి యానకారో, పురే బుద్ధదస్సనసమయే అహం యానకారో ఆసిం అహోసిన్తి అత్థో. చన్దనం ఫలకం కత్వాతి చన్దతి పరిళాహం వూపసమేతీతి చన్దనం. అథ వా చన్దన్తి సుగన్ధవాసనత్థం సరీరం విలిమ్పన్తి ఏతేనాతి చన్దనం, తం ఆలమ్బనఫలకం కత్వా. లోకబన్ధునోతి సకలలోకస్స బన్ధు ఞాతిభూతోతి లోకబన్ధు, తస్స లోకబన్ధునో సత్థుస్స అదాసిన్తి అత్థో. సేసం సువిఞ్ఞేయ్యమేవాతి.

ఫలకదాయకత్థేరఅపదానవణ్ణనా సమత్తా.

౯. వటంసకియత్థేరఅపదానవణ్ణనా

సుమేధో నామ నామేనాతిఆదికం ఆయస్మతో వటంసకియత్థేరస్స అపదానం. అయమ్పి పురిమమునిన్దేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సుమేధస్స భగవతో కాలే కులగేహే నిబ్బత్తో విఞ్ఞుతం పత్తో ఘరావాసం సణ్ఠపేత్వా తత్థ ఆదీనవం దిస్వా గేహం పహాయ తాపసపబ్బజ్జం పబ్బజిత్వా మహావనే విహాసి. తస్మిం సమయే సుమేధో భగవా వివేకకామతాయ తం వనం సమ్పాపుణి. అథ సో తాపసో భగవన్తం దిస్వా పసన్నమానసో వికసితం సళలపుప్ఫం గహేత్వా వటంసకాకారేన గన్థేత్వా భగవతో పాదమూలే ఠపేత్వా పూజేసి. భగవా తస్స చిత్తప్పసాదత్థాయ అనుమోదనమకాసి. సో తేన పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే విభవసమ్పన్నే కులే జాతో వుద్ధిమన్వాయ సద్ధో పసన్నో పబ్బజిత్వా నచిరస్సేవ అరహా అహోసి.

౪౩. సో అపరభాగే పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో సుమేధో నామ నామేనాతిఆది వుత్తం. వివేకమనుబ్రూహన్తోతి జనాకిణ్ణతం పహాయ జనవివేకం చిత్తవివేకఞ్చ అనుబ్రూహన్తో వడ్ఢేన్తో బహులీకరోన్తో మహావనం అజ్ఝోగాహి పావిసీతి అత్థో. సేసం ఉత్తానత్థమేవాతి.

వటంసకియత్థేరఅపదానవణ్ణనా సమత్తా.

౧౦. పల్లఙ్కదాయకత్థేరఅపదానవణ్ణనా

సుమేధస్స భగవతోతిఆదికం ఆయస్మతో పల్లఙ్కదాయకత్థేరస్స అపదానం. అయమ్పి పురిమబుద్ధేసు కతాధికారో అనేకేసు భవేసు నిబ్బానాధిగమత్థాయ కతపుఞ్ఞూపచయో సుమేధస్స భగవతో కాలే గహపతికులే నిబ్బత్తో వుద్ధిమన్వాయ మహాభోగసమ్పన్నో సత్థరి పసీదిత్వా ధమ్మం సుత్వా తస్స సత్థునో సత్తరతనమయం పల్లఙ్కం కారేత్వా మహన్తం పూజం అకాసి. సో తేన పుఞ్ఞేన దేవమనుస్సేసు సంసరన్తో సబ్బత్థ పూజితో అహోసి. సో అనుక్కమేన ఇమస్మిం బుద్ధుప్పాదే విభవసమ్పన్నే ఏకస్మిం కులే నిబ్బత్తో విఞ్ఞుతం పత్తో ఘరావాసం సణ్ఠపేత్వా సత్థు ధమ్మదేసనం సుత్వా పసన్నో పబ్బజిత్వా నచిరస్సేవ అరహత్తం పత్వా పుబ్బే కతపుఞ్ఞనామేన పల్లఙ్కదాయకత్థేరోతి పాకటో అహోసి. హేట్ఠా వియ ఉపరిపి పుబ్బే కతపుఞ్ఞనామేన థేరానం నామాని ఏవమేవ వేదితబ్బాని.

౪౭. సో ఏకదివసం అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో సుమేధస్స భగవతోతిఆదిమాహ. పల్లఙ్కో హి మయా దిన్నోతి పల్లఙ్కం ఊరుబద్ధాసనం కత్వా యత్థ ఉపవీసన్తి నిసీదన్తి, సో పల్లఙ్కోతి వుచ్చతి, సో పల్లఙ్కో సత్తరతనమయో మయా దిన్నో పూజితోతి అత్థో. సఉత్తరసపచ్ఛదోతి సహ ఉత్తరచ్ఛదేన సహ పచ్ఛదేన సఉత్తరసపచ్ఛదో, ఉపరివితానం బన్ధిత్వా ఆసనం ఉత్తమవత్థేహి అచ్ఛాదేత్వాతి అత్థో. సేసం పాకటమేవాతి.

పల్లఙ్కదాయకత్థేరఅపదానవణ్ణనా సమత్తా.

పన్నరసమవగ్గవణ్ణనా సమత్తా.