౭. మధుపిణ్డికత్థేరఅపదానవణ్ణనా

వివనే కాననే దిస్వాతిఆదికం ఆయస్మతో మధుపిణ్డికత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిద్ధత్థస్స భగవతో కాలే నేసాదయోనియం నిబ్బత్తో మహాఅరఞ్ఞే పటివసతి. తదా వివేకాభిరతియా సమ్పత్తం సిద్ధత్థం భగవన్తం దిస్వా సమాధితో వుట్ఠితస్స తస్స సుమధురం మధుమదాసి. తత్థ చ పసన్నమానసో వన్దిత్వా పక్కామి. సో తేనేవ పుఞ్ఞేన సమ్పత్తిం అనుభవన్తో దేవమనుస్సేసు సంసరిత్వా ఇమస్మిం బుద్ధుప్పాదే కులగేహే నిబ్బత్తో వుద్ధిప్పత్తో సత్థరి పసీదిత్వా పబ్బజితో నచిరస్సేవ అరహా అహోసి.

౩౭. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో వివనే కాననే దిస్వాతిఆదిమాహ. తత్థ వివనేతి విసేసేన వనం పత్థటం వివనం, హత్థిఅస్సరథసద్దేహి భేరిసద్దేహి చ వత్థుకామకిలేసకామేహి చ విగతం బ్యాపగతన్తి అత్థో, కాననసఙ్ఖాతే మహాఅరఞ్ఞే వివనేతి సమ్బన్ధో. ఓసధింవ విరోచన్తన్తి భవవడ్ఢకిజనానం ఇచ్ఛితిచ్ఛితం నిప్ఫాదేతీతి ఓసధం. ఓజానిబ్బత్తికారణం పటిచ్చ యాయ తారకాయ ఉగ్గతాయ ఉద్ధరన్తి గణ్హన్తీతి సా ఓసధి. ఓసధితారకా ఇవ విరోచన్తీతి వత్తబ్బే గాథాబన్ధసుఖత్థం ‘‘ఓసధింవ విరోచన్త’’న్తి చ వుత్తం. సేసం సబ్బత్థ ఉత్తానమేవాతి.

మధుపిణ్డికత్థేరఅపదానవణ్ణనా సమత్తా.