౮. సేనాసనదాయకత్థేరఅపదానవణ్ణనా

సిద్ధత్థస్స భగవతోతిఆదికం ఆయస్మతో సేనాసనదాయకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిద్ధత్థస్స భగవతో కాలే కులగేహే నిబ్బత్తో వుద్ధిప్పత్తో సత్థరి పసీదిత్వా అత్తనో వసనట్ఠానం వనన్తరం సమ్పత్తస్స భగవతో పణామం కత్వా పణ్ణసన్థరం సన్థరిత్వా అదాసి. భగవతో నిసిన్నట్ఠానస్స సమన్తతో భిత్తిపరిచ్ఛేదం కత్వా పుప్ఫపూజమకాసి. సో తేన పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో వుద్ధిప్పత్తో సత్థరి పసీదిత్వా పబ్బజితో నచిరస్సేవ అరహా అహోసి.

౪౫. సో అపరభాగే అత్తనో పుబ్బకమ్మం సరిత్వా సోమనస్సజాతో అత్తనో పుబ్బచరితాపదానం దస్సేన్తో సిద్ధత్థస్స భగవతోతిఆదిమాహ. తం సబ్బం హేట్ఠా వుత్తనయత్తా ఉత్తానత్థమేవాతి.

సేనాసనదాయకత్థేరఅపదానవణ్ణనా సమత్తా.