౬. తిపుప్ఫియత్థేరఅపదానవణ్ణనా

మిగలుద్దో పురే ఆసిన్తిఆదికం ఆయస్మతో తిపుప్ఫియత్థేరస్స అపదానం. అయమ్పి పురిమబుద్ధేసు కతాధికారో అన్తరా కేనచి అకుసలచ్ఛిద్దేన విపస్సిస్స భగవతో కాలే నేసాదకులే నిబ్బత్తో మిగలుద్దో హుత్వా అరఞ్ఞే విహరతి. తదా విపస్సిస్స భగవతో పాటలిబోధిం సమ్పుణ్ణపత్తపల్లవం హరితవణ్ణం నీలోభాసం మనోరమం దిస్వా తీహి పుప్ఫేహి పూజేత్వా పురాణపత్తం ఛడ్డేత్వా భగవతో సమ్ముఖా వియ పాటలిమహాబోధిం వన్ది. సో తేన పుఞ్ఞేన తతో చుతో దేవలోకే ఉప్పన్నో తత్థ దిబ్బసమ్పత్తిం అపరాపరం అనుభవిత్వా తతో చుతో మనుస్సేసు జాతో తత్థ చక్కవత్తిసమ్పత్తిఆదయో అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో వుద్ధిమన్వాయ సత్థు ధమ్మదేసనం సుత్వా పటిలద్ధసోమనస్సహదయో గేహం పహాయ పబ్బజిత్వా నచిరస్సేవ అరహా అహోసి.

౩౧. సో ఏవం సిద్ధిప్పత్తో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో మిగలుద్దో పురే ఆసిన్తిఆదిమాహ. తత్థ మరణాయ గచ్ఛతి పాపుణాతీతి మిగో, అథ వా మగయమానో ఇహతి పవత్తతీతి మిగో, మిగానం మారణే లుద్దో లోభీ గేధోతి మిగలుద్దో, పురే మయ్హం పుఞ్ఞకరణసమయే కాననసఙ్ఖాతే మహాఅరఞ్ఞే మిగలుద్దో ఆసిన్తి సమ్బన్ధో. పాటలిం హరితం దిస్వాతి తత్థ పకారేన తలేన రత్తవణ్ణేన భవతీతి పాటలి, పుప్ఫానం రత్తవణ్ణతాయ పాటలీతి వోహారో, పత్తానం హరితతాయ హరితం నీలవణ్ణం పాటలిబోధిం దిస్వాతి అత్థో. సేసం సబ్బత్థ ఉత్తానత్థమేవాతి.

తిపుప్ఫియత్థేరఅపదానవణ్ణనా సమత్తా.