౧. సుధాపిణ్డియత్థేరఅపదానవణ్ణనా

పూజారహే పూజయతోతిఆదికం ఆయస్మతో సుధాపిణ్డియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిద్ధత్థస్స భగవతో కాలే భగవతి ధరమానే పుఞ్ఞం కాతుమసక్కోన్తో పరినిబ్బుతే భగవతి తస్స ధాతుం నిదహిత్వా చేతియే కరీయమానే సుధాపిణ్డమదాసి. సో తేన పుఞ్ఞేన చతున్నవుతికప్పతో పట్ఠాయ ఏత్థన్తరే చతురాపాయమదిస్వా దేవమనుస్ససమ్పత్తియో అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో విఞ్ఞుతం పత్వా సత్థరి పసీదిత్వా పబ్బజితో నచిరస్సేవ అరహా అహోసి.

౧-౨. సో అపరభాగే అత్తనో పుబ్బకమ్మం సరిత్వా సోమనస్సజాతో అత్తనో పుబ్బచరితాపదానం పకాసేన్తో పూజారహేతిఆదిమాహ. తత్థ పూజారహా నామ బుద్ధపచ్చేకబుద్ధఅరియసావకాచరియుపజ్ఝాయమాతాపితుగరుఆదయో, తేసు పూజారహేసు మాలాదిపదుమవత్థాభరణచతుపచ్చయాదీహి పూజయతో పూజయన్తస్స పుగ్గలస్స పుఞ్ఞకోట్ఠాసం సహస్ససతసహస్సాదివసేన సఙ్ఖ్యం కాతుం కేనచి మహానుభావేనాపి న సక్కాతి అత్థో. న కేవలమేవ ధరమానే బుద్ధాదయో పూజయతో, పరినిబ్బుతస్సాపి భగవతో చేతియపటిమాబోధిఆదీసుపి ఏసేవ నయో.

౩. తం దీపేతుం చతున్నమపి దీపానన్తిఆదిమాహ. తత్థ చతున్నమపి దీపానన్తి జమ్బుదీపఅపరగోయానఉత్తరకురుపుబ్బవిదేహసఙ్ఖాతానం చతున్నం దీపానం తదనుగతానం ద్విసహస్సపరిత్తదీపానఞ్చ ఏకతో కత్వా సకలచక్కవాళగబ్భే ఇస్సరం చక్కవత్తిరజ్జం కరేయ్యాతి అత్థో. ఏకిస్సా పూజనాయేతన్తి ధాతుగబ్భే చేతియే కతాయ ఏకిస్సా పూజాయ ఏతం సకలజమ్బుదీపే సత్తరతనాదికం సకలం ధనం. కలం నాగ్ఘతి సోళసిన్తి చేతియే కతపూజాయ సోళసక్ఖత్తుం విభత్తస్స సోళసమకోట్ఠాసస్స న అగ్ఘతీతి అత్థో.

౪. సిద్ధత్థస్స…పే… ఫలితన్తరేతి నరానం అగ్గస్స సేట్ఠస్స సిద్ధత్థస్స భగవతో చేతియే ధాతుగబ్భమ్హి సుధాకమ్మే కరీయమానే పరిచ్ఛేదానం ఉభిన్నమన్తరే వేమజ్ఝే, అథ వా పుప్ఫదానట్ఠానానం అన్తరే ఫలన్తియా మయా సుధాపిణ్డో దిన్నో మక్ఖితోతి సమ్బన్ధో. సేసం సబ్బత్థ ఉత్తానమేవాతి.

సుధాపిణ్డియత్థేరఅపదానవణ్ణనా సమత్తా.