౬. అతీతక్ఖన్ధాదికథా

౧. నసుత్తసాధనకథావణ్ణనా

౨౯౭. ఇదాని ‘‘అతీతం ఖన్ధా’’తిఆదికథా హోతి. తత్థ ఖన్ధాదిభావావిజహనతో అతీతానాగతానం అత్థితం ఇచ్ఛన్తస్స అతీతం ఖన్ధాతి పుచ్ఛా పరవాదిస్స, అతీతస్స ఖన్ధసఙ్గహితత్తా ఆమన్తాతి పటిఞ్ఞా సకవాదిస్స. పున అతీతం నత్థీతి పుచ్ఛా పరవాదిస్స, తస్స నిరుత్తిపథసుత్తేన అత్థితాయ వారితత్తా పటిక్ఖేపో సకవాదిస్స. ఆయతనధాతుపుచ్ఛాసుపి అనాగతపఞ్హేసుపి పచ్చుప్పన్నేన సద్ధిం సంసన్దిత్వా అనులోమపటిలోమతో ఆగతపఞ్హేసుపి ‘‘అతీతం రూప’’న్తిఆదిపఞ్హేసుపి ఇమినావుపాయేన అత్థో వేదితబ్బో.

౨. సుత్తసాధనవణ్ణనా

౨౯౮. సుత్తసాధనే పన న వత్తబ్బన్తి పుచ్ఛా సకవాదిస్స. తత్థ నత్థి చేతేతి నత్థి చ ఏతే ధమ్మాతి అత్థో. ఖన్ధాదిభావే సతి నత్థితం అనిచ్ఛన్తస్స ఆమన్తాతి పటిఞ్ఞా పరవాదిస్స, అథ నేసం నత్థిభావసాధనత్థం సుత్తాహరణం సకవాదిస్స. దుతియపుచ్ఛాపి పరవాదిస్స, పటిఞ్ఞా సకవాదిస్స, సుత్తాహరణం పరవాదిస్స. తం పన నేసం ఖన్ధాదిభావమేవ సాధేతి, న అత్థిభావన్తి ఆహటమ్పి అనాహటసదిసమేవాతి.

అతీతం ఖన్ధాతిఆదికథావణ్ణనా.