౧౩-౧౮. అనులోమపచ్చనీయపట్ఠానవణ్ణనా

౧. ఇదాని కుసలాదీసు ధమ్మేసు పచ్చయధమ్మం అప్పటిక్ఖిపిత్వా పచ్చయుప్పన్నస్స కుసలాదిభావపటిక్ఖేపవసేన ధమ్మానం అనులోమపచ్చనీయతాయ లద్ధనామం అనులోమపచ్చనీయపట్ఠానం దస్సేతుం కుసలం ధమ్మం పటిచ్చ న కుసలో ధమ్మో ఉప్పజ్జతి హేతుపచ్చయాతిఆది ఆరద్ధం. తత్థ కుసలం ధమ్మం పటిచ్చాతి కుసలస్స పచ్చయభావం అనుజానాతి. న కుసలో ధమ్మో ఉప్పజ్జతీతి కుసలస్సేవ ఉప్పత్తిం వారేతి. తస్మా ‘‘కుసలే ఖన్ధే పటిచ్చ చిత్తసముట్ఠానం రూప’’న్తిఆదినా నయేన విస్సజ్జనం దస్సితం, తం సబ్బం పాళిం ఓలోకేత్వా సాధుకం సల్లక్ఖేతబ్బం. యమ్పి యేన సదిసం, యఞ్చ యత్థ లబ్భతి, యో చ యేసం విస్సజ్జనానం యేసు పచ్చయేసు గణనపరిచ్ఛేదో, సో సబ్బో పాళియం దస్సితో, తస్మా పాళియేవ ఏత్థ అత్థో. యథా చేత్థ, ఏవం దుకపట్ఠానాదీసుపీతి.

ఏత్తావతా –

తికఞ్చ పట్ఠానవరం దుకుత్తమం,

దుకం తికఞ్చేవ తికం దుకఞ్చ;

తికం తికఞ్చేవ దుకం దుకఞ్చ,

ఛ అనులోమపచ్చనీయమ్హి నయా సుగమ్భీరాతి. –

అట్ఠకథాయం వుత్తగాథాయ దీపితా ధమ్మానులోమపచ్చనీయపట్ఠానే ఛ నయా నిద్దిట్ఠా హోన్తి. పచ్చయవసేన పనేత్థ ఏకేకస్మిం పట్ఠానే అనులోమాదయో చత్తారో చత్తారో నయాతి ఏకేన పరియాయేన చతువీసతినయపటిమణ్డితం అనులోమపచ్చనీయపట్ఠానఞ్ఞేవ వేదితబ్బం.

అనులోమపచ్చనీయపట్ఠానవణ్ణనా.