౨. దుకపట్ఠానవణ్ణనా

దుకపట్ఠానేపి సబ్బదుకేసు పఞ్హావిస్సజ్జనాని చేవ గణనా చ పాళియం ఆగతనయేనేవ వేదితబ్బా. అపిచేత్థ సహేతుకహేతుసమ్పయుత్తదుకానం విస్సజ్జనం హేతుదుకవిస్సజ్జనసదిసం; తథా హేతూచేవసహేతుకహేతూచేవహేతుసమ్పయుత్తదుకానం, తథా సప్పచ్చయసఙ్ఖతదుకానం. ఇదం దుకం యథా సప్పచ్చయదుకం, ఏవం కాతబ్బన్తి ఇదం యస్మా సప్పచ్చయో వియ అప్పచ్చయేన సఙ్ఖతోపి, అసఙ్ఖతేన సద్ధిం యోజనం న లబ్భతి, తస్మా వుత్తం. సారమ్మణచిత్తసమ్పయుత్తసంసట్ఠదుకాపి సదిసవిస్సజ్జనాయేవ; తథా ఆసవఓఘయోగగోచ్ఛకా. ఏతే హి తయో అఞ్ఞమఞ్ఞం సదిసవిస్సజ్జనాయేవ. అపిచ లోకియసాసవసంయోజనియగన్థనియనీవరణియపరామట్ఠసఙ్కిలేసికదుకా ఆసవవిప్పయుత్తసాసవసంయోజనవిప్పయుత్తసంయోజనియగన్థవిప్పయుత్తగన్థనియనీవరణవిప్పయుత్తనీవరణియపరామాసవిప్పయుత్తపరామట్ఠకిలేసవిప్పయుత్తసఙ్కిలేసికపరియాపన్నసఉత్తరదుకాత ఇమేపి దుకా సమానా.

కిలేసదుకం సంయోజనదుకసదిసం. సఙ్కిలిట్ఠకిలేససమ్పయుత్తనీవరణసమ్పయుత్తదస్సనేనపహాతబ్బసరణదుకాపి సమానా. తథాకిలేసా చేవ సఙ్కిలిట్ఠనీవరణా చేవ నీవరణసమ్పయుత్తకిలేసా చేవ కిలేససమ్పయుత్తదుకా. ఇమినా నయేన సబ్బేసం అత్థతో సదిసానం దుకానం విస్సజ్జనాని సదిసానేవ హోన్తీతి వేదితబ్బాని. సబ్బస్మిమ్పి పన పట్ఠానే కేనచివిఞ్ఞేయ్యదుకం న లబ్భతి. ఆసవా చేవ ఆసవసమ్పయుత్తా చ, సంయోజనా చేవ సంయోజనసమ్పయుత్తా చ, గన్థా చేవ గన్థసమ్పయుత్తా చ, నీవరణా చేవ నీవరణసమ్పయుత్తా చ, కిలేసా చేవ సఙ్కిలిట్ఠా చాతి ఏవరూపేసు దుకేసు విపాకపచ్చయో చేవ నానాక్ఖణికకమ్మపచ్చయో చ న లబ్భతి. నహేతుసహేతుకనహేతుఅహేతుకేసు హేతుపచ్చయో నత్థి. హేతూ చేవ హేతుసమ్పయుత్తా చ, ఆసవా చేవ ఆసవసమ్పయుత్తా చ, గన్థా చేవ గన్థసమ్పయుత్తా చాతి ఇమేసు దుకేసు నహేతునఝాననమగ్గా న లబ్భన్తి. సంయోజనా చేవ సంయోజనసమ్పయుత్తా చ, నీవరణా చేవ నీవరణసమ్పయుత్తా చ, కిలేసా చేవ కిలేససమ్పయుత్తా చ, కిలేసా చేవ సఙ్కిలిట్ఠా చాతి ఇమేసు పన విచికిచ్ఛుద్ధచ్చసహగతస్స మోహస్స వసేన నహేతుపచ్చయో లబ్భతి; నఝాననమగ్గపచ్చయా న లబ్భన్తీతి ఏవం సబ్బదుకేసు లబ్భమానాలబ్భమానం ఉపపరిక్ఖిత్వా పాళివసేనేవ వారగణనా వేదితబ్బాతి.

దుకపట్ఠానవణ్ణనా.