౬. సబ్బదిసాకథావణ్ణనా

౮౮౬. ఇదాని సబ్బదిసాకథా నామ హోతి. తత్థ చతూసు దిసాసు హేట్ఠా ఉపరీతి సమన్తతో లోకధాతుసన్నివాసం, సబ్బలోకధాతూసు చ బుద్ధా అత్థీతి అత్తనో వికప్పసిప్పం ఉప్పాదేత్వా ‘‘సబ్బదిసాసు బుద్ధా తిట్ఠన్తీ’’తి యేసం లద్ధి, సేయ్యథాపి మహాసఙ్ఘికానం; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. పురత్థిమాయాతి పుట్ఠో సక్యమునిం సన్ధాయ పటిక్ఖిపతి. పున పుట్ఠో లద్ధివసేన అఞ్ఞలోకధాతుయం ఠితం సన్ధాయ పటిజానాతి. కిన్నామో సో భగవాతిఆది ‘‘సచే త్వం జానాసి, నామాదివసేన నం కథేహీ’’తి చోదనత్థం వుత్తం. ఇమినా ఉపాయేన సబ్బత్థ అత్థో వేదితబ్బోతి.

సబ్బదిసాకథావణ్ణనా.