౫. మగ్గకథావణ్ణనా

౮౭౨-౮౭౫. ఇదాని మగ్గకథా నామ హోతి. తత్థ యేసం ‘‘పుబ్బేవ ఖో పనస్స కాయకమ్మం వచీకమ్మం ఆజీవో సుపరిసుద్ధో హోతీ’’తి (అ. ని. ౩.౪౩౧) ఇదఞ్చేవ సుత్తం సమ్మావాచాకమ్మన్తాజీవానఞ్చ చిత్తవిప్పయుత్తతం నిస్సాయ ‘‘నిప్పరియాయేన పఞ్చఙ్గికోవ మగ్గో’’తి లద్ధి, సేయ్యథాపి మహిసాసకానం, తే సన్ధాయ పఞ్చఙ్గికోతి పుచ్ఛా సకవాదిస్స, పటిఞ్ఞా ఇతరస్స. సమ్మావాచా మగ్గఙ్గం, సా చ న మగ్గోతిఆది పరసమయవసేన వుత్తం. పరసమయస్మిఞ్హి సమ్మావాచాదయో మగ్గఙ్గన్తి ఆగతా. రూపత్తా పన మగ్గో న హోతీతి వణ్ణితా. సమ్మాదిట్ఠి మగ్గఙ్గన్తిఆది మగ్గఙ్గస్స అమగ్గతా నామ నత్థీతి దస్సనత్థం వుత్తం. పుబ్బేవ ఖో పనస్సాతి సుత్తే పరిసుద్ధసీలస్స మగ్గభావనా నామ హోతి, న ఇతరస్సాతి ఆగమనియపటిపదాయ విసుద్ధిభావదస్సనత్థం ‘‘కాయకమ్మం వచీకమ్మం ఆజీవో సుపరిసుద్ధో హోతీ’’తి వుత్తం, న ఇమేహి వినా పఞ్చఙ్గికభావదస్సనత్థం. తేనేవాహ ‘‘ఏవమస్సాయం అరియో అట్ఠఙ్గికో మగ్గో భావనాపారిపూరిం గచ్ఛతీ’’తి. సకవాదినా ఆభతసుత్తం నీతత్థమేవాతి.

మగ్గకథావణ్ణనా.