౮. న వత్తబ్బం సఙ్ఘో భుఞ్జతీతికథావణ్ణనా

౭౯౫-౭౯౬. ఇదాని న వత్తబ్బం సఙ్ఘో భుఞ్జతీతికథా నామ హోతి. తత్రాపి ‘‘మగ్గఫలానేవ సఙ్ఘో నామ, న చ తాని కిఞ్చి భుఞ్జన్తి, తస్మా న వత్తబ్బం సఙ్ఘో భుఞ్జతి, పివతి, ఖాదతి, సాయతీ’’తి యేసం లద్ధి, సేయ్యథాపి తేసంయేవ; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. అథ నం ‘‘యది సఙ్ఘో న భుఞ్జేయ్య, సఙ్ఘభత్తాదికరణం నిరత్థకం భవేయ్యా’’తి చోదేతుం నను అత్థి కేచి సఙ్ఘభత్తాని కరోన్తీతిఆదిమాహ. గణభోజనన్తిఆది ‘‘యది సఙ్ఘో న భుఞ్జేయ్య, కస్స గణభోజనాదీని సియు’’న్తి చోదనత్థం వుత్తం. అట్ఠ పానానీతి ఇదమ్పి ‘‘యది సఙ్ఘో న పివేయ్య, కస్సేతాని పానాని సత్థా అనుజానేయ్యా’’తి చోదనత్థం వుత్తం. సేసమిధాపి హేట్ఠా వుత్తనయేనేవ వేదితబ్బన్తి.

న వత్తబ్బం సఙ్ఘో భుఞ్జతీతికథావణ్ణనా.