౯. ధమ్మతణ్హాఅబ్యాకతాతికథావణ్ణనా

౬౭౬-౬౮౦. ఇదాని ధమ్మతణ్హా అబ్యాకతాతికథా నామ హోతి. తత్థ రూపతణ్హా…పే… ధమ్మతణ్హాతి ఇమాసు ఛసు తణ్హాసు యస్మా సబ్బపచ్ఛిమా తణ్హా ధమ్మతణ్హాతి వుత్తా, తస్మా సా అబ్యాకతాతి యేసం లద్ధి, సేయ్యథాపి పుబ్బసేలియానం; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. సేసపఞ్హానం పాళియా అత్థో నియ్యాతి. కామతణ్హాతిఆదీహి తీహి కోట్ఠాసేహి ఛపి తణ్హా సఙ్ఖిపిత్వా దస్సితా. రూపాదీసు హి ఛసు ఆరమ్మణేసు కామస్సాదవసేన పవత్తా తణ్హా కామతణ్హా. ‘‘భవిస్సతి అత్తా చ లోకో చా’’తి సస్సతదిట్ఠిసహగతా తణ్హా భవతణ్హా. ‘‘న భవిస్సతీ’’తి ఉచ్ఛేదదిట్ఠిసహగతా తణ్హా విభవతణ్హాతి. నను సా ధమ్మతణ్హాతి పదం తణ్హాయ ధమ్మారమ్మణం ఆరబ్భ పవత్తిం దీపేతి, న అబ్యాకతభావం తస్మా అసాధకన్తి.

ధమ్మతణ్హా అబ్యాకతాతికథావణ్ణనా.