౭. సమాపన్నో అస్సాదేతీతికథావణ్ణనా

౬౭౧-౬౭౩. ఇదాని సమాపన్నో అస్సాదేతీతికథా నామ హోతి. తత్థ ‘‘పఠమం ఝానం ఉపసమ్పజ్జ విహరతి, సో తదస్సాదేతీ’’తిఆదివచనం (అ. ని. ౪.౧౨౩) నిస్సాయ ‘‘సమాపన్నో అస్సాదేతి, సా చస్స ఝాననికన్తి ఝానారమ్మణా హోతీ’’తి యేసం లద్ధి, సేయ్యథాపి అన్ధకానం, తే సన్ధాయ సమాపన్నోతి పుచ్ఛా సకవాదిస్స, పటిఞ్ఞా ఇతరస్స. తం ఝానం తస్స ఝానస్స ఆరమ్మణన్తి పఞ్హేసు తస్సేవ తదారమ్మణతం అపస్సన్తో సుత్తవిరోధభయేన పటిక్ఖిపతి, ‘‘తదస్సాదేతీ’’తివచనమత్తేన పటిజానాతి. సో తదస్సాదేతీతి సుత్తం ఝానలాభినో ఝానా వుట్ఠాయ ఝానస్సాదం సాధేతి, న అన్తోసమాపత్తియంయేవ ఝాననికన్తియా ఝానారమ్మణతం, తస్మా అసాధకన్తి.

సమాపన్నో అస్సాదేతీతికథావణ్ణనా.