౪. నియతస్స నియామకథావణ్ణనా

౬౬౩-౬౬౪. ఇదాని నియతస్స నియామకథా నామ హోతి. తత్థ దువిధో నియామో – మిచ్ఛత్తనియామో చ ఆనన్తరియకమ్మం, సమ్మత్తనియామో చ అరియమగ్గో. ఇమే ద్వే నియామే ఠపేత్వా అఞ్ఞో నియామో నామ నత్థి. సబ్బేపి హి సేసా తేభూమకధమ్మా అనియతా నామ. తేహి సమన్నాగతోపి అనియతోయేవ. బుద్ధేహి పన అత్తనో ఞాణబలేన ‘‘అయం సత్తో అనాగతే బోధిం పాపుణిస్సతీ’’తి బ్యాకతో బోధిసత్తో పుఞ్ఞుస్సదత్తా నియతోతి వుచ్చతి. ఇతి ఇమం వోహారమత్తం గహేత్వా ‘‘పచ్ఛిమభవికో బోధిసత్తో తాయ జాతియా భబ్బో ధమ్మం అభిసమేతు’’న్తి అధిప్పాయేన ‘‘నియతో నియామం ఓక్కమతీ’’తి యేసం లద్ధి, సేయ్యథాపి పుబ్బసేలియాపరసేలియానం; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. మిచ్ఛత్తనియతోతిఆది అఞ్ఞేన నియామేన నియతస్స అఞ్ఞనియామాభావదస్సనత్థం వుత్తం. పుబ్బే మగ్గం భావేత్వాతిఆది నియామప్పభేదదస్సనత్థం వుత్తం. సతిపట్ఠానన్తిఆది ఏకస్మిమ్పి నియామే ధమ్మప్పభేదదస్సనత్థం వుత్తం. భబ్బో బోధిసత్తోతి వచనం కేవలం బోధిసత్తస్స భబ్బతం దీపేతి, న నియతస్స నియామోక్కమనం, తస్మా అసాధకం. సో హి పుబ్బే ఏకేనపి నియతధమ్మేన అనియతో బోధిమూలే సచ్చదస్సనేన నియామం ఓక్కన్తోతి.

నియతస్స నియామకథావణ్ణనా.