౯. ధమ్మట్ఠితతాకథావణ్ణనా

౬౨౭. ఇదాని ధమ్మట్ఠితతాకథా నామ హోతి. తత్థ ‘‘ఠితావ సా ధాతూ’’తి వచనం నిస్సాయ ‘‘పటిచ్చసముప్పాదసఙ్ఖాతా ధమ్మట్ఠితతా నామ ఏకా అత్థి, సా చ పరినిప్ఫన్నా’’తి యేసం లద్ధి, సేయ్యథాపి అన్ధకానం; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. అథ నం ‘‘యది పరినిప్ఫన్నానం అవిజ్జాదీనం అఞ్ఞా ధమ్మట్ఠితతా నామ పరినిప్ఫన్నా అత్థి, తాయపి చ తే ధమ్మట్ఠితతాయ అఞ్ఞా ఠితతా పరినిప్ఫన్నా ఆపజ్జతీ’’తి చోదేతుం తాయ ఠితతాతిఆదిమాహ. పరవాదీ ఏవరూపాయ లద్ధియా అభావేన పటిక్ఖిపతి. దుతియం పుట్ఠో అనన్తరపచ్చయతఞ్చేవ అఞ్ఞమఞ్ఞపచ్చయతఞ్చ సన్ధాయ పటిజానాతి. సేసం హేట్ఠా వుత్తనయత్తా ఉత్తానత్థమేవాతి.

ధమ్మట్ఠితతాకథావణ్ణనా.