౨. రూపంమగ్గోతికథావణ్ణనా

౫౭౩-౫౭౫. ఇదాని రూపం మగ్గోతికథా నామ హోతి. తత్థ యేసం ‘‘సమ్మావాచాకమ్మన్తాజీవా రూప’’న్తి లద్ధి, సేయ్యథాపి మహిసాసకసమ్మితియమహాసంఘికానం; తే సన్ధాయ మగ్గసమఙ్గిస్సాతి పుచ్ఛా సకవాదిస్స, పటిఞ్ఞా ఇతరస్స. అథ నం ‘‘యది తే సమ్మావాచాదయో రూపం, న విరతియో, యథా సమ్మాదిట్ఠాదిమగ్గో సారమ్మణాదిసభావో, ఏవం తమ్పి రూపం సియా’’తి చోదేతుం సారమ్మణోతిఆదిమాహ. తత్థ పటిక్ఖేపో చ పటిఞ్ఞా చ పరవాదినో లద్ధిఅనురూపేన వేదితబ్బా. సేసమేత్థ ఉత్తానత్థమేవాతి.

రూపం మగ్గోతికథావణ్ణనా.