౧౦. విఞ్ఞత్తి సీలన్తికథావణ్ణనా

౬౦౧-౬౦౨. ఇదాని విఞ్ఞత్తి సీలన్తికథా నామ హోతి. తత్థ కాయవిఞ్ఞత్తి కాయకమ్మం, వచీవిఞ్ఞత్తి వచీకమ్మన్తి గహితత్తా ‘‘విఞ్ఞత్తి సీల’’న్తి యేసం లద్ధి, సేయ్యథాపి మహాసంఘికానఞ్చేవ సమ్మితియానఞ్చ; తే సన్ధాయ విఞ్ఞత్తీతి పుచ్ఛా సకవాదిస్స, పటిఞ్ఞా ఇతరస్స. అథ నం యస్మా సీలం నామ విరతి, న రూపధమ్మో, తస్మా తేనత్థేన చోదేతుం పాణాతిపాతా వేరమణీతిఆదిమాహ. అభివాదనం సీలన్తిఆది యథారూపం విఞ్ఞత్తిం సో ‘‘సీల’’న్తి మఞ్ఞతి తం ఉద్ధరిత్వా దస్సేతుం వుత్తం. యస్మా పన సా విరతి న హోతి, తస్మా పున పాణాతిపాతాతిఆదిమాహ. లద్ధి పనస్స ఛలేన పతిట్ఠితత్తా అప్పతిట్ఠితాయేవాతి.

విఞ్ఞత్తి సీలన్తికథావణ్ణనా.