౨. అమతారమ్మణకథావణ్ణనా

౫౪౯. ఇదాని అమతారమ్మణకథా నామ హోతి. తత్థ యేసం ‘‘నిబ్బానం మఞ్ఞతీ’’తిఆదీనం అయోనిసో అత్థం గహేత్వా అమతారమ్మణం సంయోజనం హోతీతి లద్ధి, సేయ్యథాపి పుబ్బసేలియానం, తే సన్ధాయ పుచ్ఛా సకవాదిస్స, పటిఞ్ఞా ఇతరస్స. అథ నం సచే అమతారమ్మణం సంయోజనం, అమతస్స సంయోజనియాదిభావో ఆపజ్జతీతి చోదేతుం అమతం సంయోజనియన్తిఆదిమాహ. ఇతరో సుత్తవిరోధభయేన సబ్బం పటిక్ఖిపతి. ఇమినా ఉపాయేన సబ్బవారేసు అత్థో వేదితబ్బో. నిబ్బానం నిబ్బానతోతి ఆహటసుత్తం పన దిట్ఠధమ్మనిబ్బానం సన్ధాయ భాసితం, తస్మా అసాధకన్తి.

అమతారమ్మణకథావణ్ణనా.