౩. అనాసవకథావణ్ణనా

౩౯౧. ఇదాని అనాసవకథా నామ హోతి. తత్థ యే ధమ్మా అనాసవస్స అరహతో, సబ్బే తే అనాసవాతి యేసం లద్ధి, సేయ్యథాపి ఏతరహి ఉత్తరాపథకానం; తే సన్ధాయ అరహతోతి పుచ్ఛా సకవాదిస్స, పటిఞ్ఞా ఇతరస్స. అథ నం అనాసవా నామ మగ్గాదయో, కిం తస్స తేయేవ ఉప్పజ్జన్తీతి చోదనత్థం మగ్గో ఫలన్తిఆది ఆరద్ధం. చక్ఖు అనాసవన్తి పుట్ఠో తస్స సాసవత్తా పటిక్ఖిపతి. దుతియం పుట్ఠో అనాసవస్సేతన్తి పటిజానాతి.

౩౯౨. చీవరపఞ్హే ఏకోవ ధమ్మో అనాసవో సాసవో చ హోతీతి లక్ఖణవిరోధభయా పటిక్ఖిపతి. దుతియం పుట్ఠో అనాసవస్స హుత్వా సాసవస్స హోతీతి పటిజానాతి. తఞ్ఞేవ అనాసవన్తి పఞ్హాద్వయేపి ఏసేవ నయో. సకవాదీ పన తఞ్ఞేవాతి అనుఞ్ఞాతత్తా ‘‘మగ్గో అనాసవో హుత్వా’’తిఆదీహి చోదేతి. ఇమినా ఉపాయేన సబ్బత్థ అత్థో వేదితబ్బోతి.

అనాసవకథావణ్ణనా.