౧. గిహిస్స అరహాతికథావణ్ణనా

౩౮౭. ఇదాని గిహిస్స అరహాతి కథా నామ హోతి. తత్థ యేసం యసకులపుత్తాదీనం గిహిబ్యఞ్జనే ఠితానం అరహత్తప్పత్తిం దిస్వా ‘‘గిహి అస్స అరహా’’తి లద్ధి, సేయ్యథాపి ఏతరహి ఉత్తరాపథకానం; తే సన్ధాయ పుచ్ఛా సకవాదిస్స. తత్థ గిహిస్సాతి యో గిహిసంయోజనసమ్పయుత్తతాయ గిహి, సో అరహం అస్సాతి అత్థో. పరవాదీ పన అధిప్పాయం అసల్లక్ఖేత్వా గిహిబ్యఞ్జనమత్తమేవ పస్సన్తో పటిజానాతి. ఇదానిస్స ‘‘గిహి నామ గిహిసంయోజనేన హోతి, న బ్యఞ్జనమత్తేన. యథాహ భగవా –

‘అలఙ్కతో చేపి సమం చరేయ్య,

సన్తో దన్తో నియతో బ్రహ్మచారీ;

సబ్బేసు భూతేసు నిధాయ దణ్డం,

సో బ్రాహ్మణో సో సమణో స భిక్ఖూ’’’తి. (ధ. ప. ౧౪౨);

ఇమం నయం దస్సేతుం అత్థి అరహతోతిఆది ఆరద్ధం. తం సబ్బం ఉత్తానత్థమేవాతి.

గిహిస్స అరహాతికథావణ్ణనా.