౧౧. అసఞ్ఞకథావణ్ణనా

౩౮౧. ఇదాని అసఞ్ఞకథా నామ హోతి. తత్థ యేసం ‘‘సఙ్ఖారపచ్చయా విఞ్ఞాణ’’న్తి వచనతో వినా విఞ్ఞాణేన పటిసన్ధి నామ నత్థి. ‘‘సఞ్ఞుప్పాదా చ పన తే దేవా తమ్హా కాయా చవన్తీ’’తి వచనతో అసఞ్ఞసత్తానమ్పి చుతిపటిసన్ధిక్ఖణే సఞ్ఞా అత్థీతి లద్ధి, సేయ్యథాపి ఏతరహి అన్ధకానం; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. తతో నం సకవాదీ ‘‘కిం తే తం ఠానం సఞ్ఞాభవో’’తిఆదీహి చోదేతుం సఞ్ఞాభవో సఞ్ఞాగతీతిఆదిమాహ. తం సబ్బం తతో పరఞ్చ పాళినయేనేవ వేదితబ్బన్తి.

అసఞ్ఞకథావణ్ణనా.