౮. కుక్కుళకథావణ్ణనా

౩౩౮. ఇదాని కుక్కుళకథా నామ హోతి. తత్థ యేసం ‘‘సబ్బం, భిక్ఖవే, ఆదిత్తం (సం. ని. ౪.౨౮; మహావ. ౫౪) సబ్బే సఙ్ఖారా దుక్ఖా’’తిఆదీని (ధ. ప. ౨౭౮) సుత్తాని అయోనిసో గహేత్వా ‘‘నిప్పరియాయేనేవ సబ్బే సఙ్ఖారా కుక్కుళా వీతచ్చితఙ్గారసమ్మిస్సా ఛారికనిరయసదిసా’’తి లద్ధి, సేయ్యథాపి ఏతరహి గోకులికానం; తేసం నానప్పకారసుఖసన్దస్సనేన తం లద్ధిం వివేచేతుం పుచ్ఛా సకవాదిస్స, పటిఞ్ఞా పరవాదిస్స. తత్థ అనోధిం కత్వాతి ఓధిం మరియాదం కోట్ఠాసం అకరిత్వా, అవిసేసేన సబ్బేయేవాతి అత్థో. సేసం సబ్బం పాళినయేనేవ వేదితబ్బం సద్ధిం సుత్తసాధనాయాతి.

కుక్కుళకథావణ్ణనా.