౯. హేవత్థికథావణ్ణనా

౩౦౪. ఇదాని హేవత్థికథా నామ హోతి. తత్థ యేసం ‘‘సబ్బేపి అతీతాదిభేదా ధమ్మా రూపాదివసేన అత్థి, అతీతం అనాగతపచ్చుప్పన్నవసేన, అనాగతపచ్చుప్పన్నాని వా అతీతాదివసేన నత్థి; తస్మా సబ్బమేవిదం ఏవం అత్థి ఏవం నత్థీ’’తి లద్ధి, సేయ్యథాపి ఏతరహి వుత్తప్పభేదానం అన్ధకానం; తే సన్ధాయ అతీతం అత్థీతి పుచ్ఛా సకవాదిస్స. హేవత్థి హేవ నత్థీతి విస్సజ్జనం పరవాదిస్స. తత్థ హేవాతి ఏవం. అథ నం సకవాదీ ‘‘యది అతీతోవ ఏవం అత్థి, ఏవం నత్థీతి లద్ధి, ఏవం సన్తే సోయేవ అత్థి, సోయేవ నత్థి నామా’’తి పుచ్ఛన్తో సేవత్థి, సేవ నత్థీతి ఆహ. ఇతరో తేనేవ సభావేన అత్థితం, తేనేవ నత్థితం సన్ధాయ పటిక్ఖిపతి. దుతియం పుట్ఠో సకభావేనేవ అత్థితం, పరభావేనేవ నత్థితం సన్ధాయ పటిజానాతి. తతో పరం అత్థట్ఠో నత్థట్ఠోతి అత్థిసభావో నత్థిసభావో నామ హోతీతి పుచ్ఛతి. ఇమినావుపాయేన సబ్బవారేసు అత్థో వేదితబ్బో. పరియోసానే పన ‘‘తేన హి అతీతం హేవత్థి, హేవ నత్థీ’’తి చ ‘‘తేన హి రూపం హేవత్థి, హేవ నత్థీ’’తి చాతిఆదీని వత్వా కిఞ్చాపి పరవాదినా లద్ధి పతిట్ఠాపితా, అయోనిసో పతిట్ఠాపితత్తా పనేసా అప్పతిట్ఠాపితాయేవాతి.

హేవత్థికథావణ్ణనా.

మహావగ్గో నిట్ఠితో.