౧౦. దసకనిద్దేసవణ్ణనా

౨౦౯. దసకనిద్దేసే – ఇధాతి కామావచరభూమియం. కామావచరభూమియఞ్హి సత్తక్ఖత్తుపరమాదీనం కామావచరభూమియఞ్ఞేవ నిట్ఠా హోతి. కామావచరత్తభావేనేవ అరహత్తప్పత్తి చ అనుపాదిసేసనిబ్బానప్పత్తి చ హోతీతి అత్థో.

ఇధ విహాయాతి ఇధ కామావచరే అత్తభావే విహాయ సుద్ధావాసత్తభావే ఠితానం నిట్ఠా హోతీతి అత్థో. అన్తరాపరినిబ్బాయిఆదయో హి ఇధ అనాగామిఫలం పత్వా ఇతో చుతా సుద్ధావాసేసు ఉప్పజ్జిత్వా తేన అత్తభావేన అరహత్తఞ్చేవ అనుపాదిసేసనిబ్బానధాతుఞ్చ పాపుణన్తి. తేన వుత్తం – ‘‘ఇమేసం పఞ్చన్నం ఇధ విహాయ నిట్ఠా’’తి.

దసకనిద్దేసవణ్ణనా.

నిగమనకథా

ఏత్తావతా చ –

యం వే పుగ్గలపఞ్ఞత్తిం, లోకే అప్పటిపుగ్గలో;

నాతిసఙ్ఖేపతో సత్థా, దేసేసి తిదసాలయే.

తస్సా అట్ఠకథఞ్చేవ, దీపభాసాయ సఙ్ఖతం;

ఆగమట్ఠకథాయో చ, ఓగాహేత్వా అసేసతో.

సువిభత్తో అసంకిణ్ణో, యో యో అత్థో యహిం యహిం;

తతో తతో తం గహేత్వా, పహాయ అతివిత్థారం.

విసుద్ధిమగ్గే యం వుత్తం, తం అనాదాయ సఙ్ఖతా;

నాతిసఙ్ఖేపవిత్థార-నయేనట్ఠకథా అయం.

తం ఏతం సత్తమత్తేహి, భాణవారేహి తన్తియా;

చిరట్ఠితత్థం ధమ్మస్స, సఙ్ఖరోన్తేన యం మయా.

సమ్పత్తం కుసలం తేన, సద్ధమ్మం సుఖుమం సివం;

ఓలోకేన్తు విసుద్ధేన, పాణయో ధమ్మచక్ఖునాతి.

పుగ్గలపఞ్ఞత్తి-అట్ఠకథా నిట్ఠితా.

నమో తస్స భగవతో అరహతో సమ్మాసమ్బుద్ధస్స