౧౦. కుసీతారమ్భవత్థుసుత్తవణ్ణనా

౮౦. దసమే కుసీతవత్థూనీతి కుసీతస్స అలసస్స వత్థూని పతిట్ఠా, కోసజ్జకారణానీతి అత్థో. కమ్మం కత్తబ్బం హోతీతి చీవరవిచారణాదికమ్మం కత్తబ్బం హోతి. న వీరియం ఆరభతీతి దువిధమ్పి వీరియం నారభతి. అప్పత్తస్సాతి ఝానవిపస్సనామగ్గఫలధమ్మస్స అప్పత్తస్స పత్తియా. అనధిగతస్సాతి తస్సేవ అనధిగతస్స అధిగమత్థాయ. అసచ్ఛికతస్సాతి తదేవ అసచ్ఛికతస్స సచ్ఛికరణత్థాయ. ఇదం పఠమన్తి ఇదం ‘‘హన్దాహం నిపజ్జామీ’’తి ఏవం ఓసీదనం పఠమం కుసీతవత్థు. ఇమినా నయేన సబ్బత్థ అత్థో వేదితబ్బో. మాసాచితకం మఞ్ఞేతి ఏత్థ పన మాసాచితం నామ తిన్తమాసో. యథా తిన్తమాసో గరుకో హోతి, ఏవం గరుకోతి అధిప్పాయో. గిలానా వుట్ఠితో హోతీతి గిలానో హుత్వా పచ్ఛా వుట్ఠితో హోతి. ఆరమ్భవత్థూనీతి వీరియకారణాని. తేసమ్పి ఇమినావ నయేన అత్థో వేదితబ్బో. సేసం సబ్బత్థ ఉత్తానమేవాతి.

యమకవగ్గో అట్ఠమో.