౧. ధనవగ్గో

౧-౫. పఠమపియసుత్తాదివణ్ణనా

౧-౫. సత్తకనిపాతస్స పఠమే అనవఞ్ఞత్తికామోతి అభిఞ్ఞాతభావకామో. తతియే యోనిసో విచినే ధమ్మన్తి ఉపాయేన చతుసచ్చధమ్మం విచినాతి. పఞ్ఞాయత్థం విపస్సతీతి సహవిపస్సనాయ మగ్గపఞ్ఞాయ సచ్చధమ్మం విపస్సతి. పజ్జోతస్సేవాతి దీపస్సేవ. విమోక్ఖో హోతి చేతసోతి తస్స ఇమేహి బలేహి సమన్నాగతస్స ఖీణాసవస్స దీపనిబ్బానం వియ చరిమకచిత్తస్స వత్థారమ్మణేహి విమోక్ఖో హోతి, గతట్ఠానం న పఞ్ఞాయతి. చతుత్థే సద్ధో హోతీతిఆదీని పఞ్చకనిపాతే వణ్ణితానేవ. పఞ్చమే ధనానీతి అదాలిద్దియకరణట్ఠేన ధనాని.

౭. ఉగ్గసుత్తవణ్ణనా

౭. సత్తమే ఉగ్గో రాజమహామత్తోతి పసేనదికోసలస్స మహాఅమచ్చో. ఉపసఙ్కమీతి భుత్తపాతరాసో ఉపసఙ్కమి. అడ్ఢోతి నిధానగతేన ధనేన అడ్ఢో. మిగారో రోహణేయ్యోతి రోహణసేట్ఠినో నత్తారం మిగారసేట్ఠిం సన్ధాయేవమాహ. మహద్ధనోతి వళఞ్జనధనేన మహద్ధనో. మహాభోగోతి ఉపభోగపరిభోగభణ్డస్స మహన్తతాయ మహాభోగో. హిరఞ్ఞస్సాతి సువణ్ణస్సేవ. సువణ్ణామేవ హిస్స కోటిసఙ్ఖ్యం అహోసి. రూపియస్సాతి సేసస్స తట్టకసరకఅత్థరణపావురణాదినో పరిభోగపరిక్ఖారస్స పమాణసఙ్ఖానే వాదోయేవ నత్థి.

౮. సంయోజనసుత్తవణ్ణనా

౮. అట్ఠమే అనునయసంయోజనన్తి కామరాగసంయోజనం. సబ్బానేవ చేతాని బన్ధనట్ఠేన సంయోజనానీతి వేదితబ్బాని. ఇమస్మిం సుత్తే వట్టమేవ కథితం. సేసం సబ్బత్థ ఉత్తానత్థమేవాతి.

ధనవగ్గో పఠమో.