౭. దేవతావగ్గో

౧-౩. అనాగామిఫలసుత్తాదివణ్ణనా

౬౫-౬౭. సత్తమస్స పఠమే అస్సద్ధియన్తి అస్సద్ధభావం. దుప్పఞ్ఞతన్తి నిప్పఞ్ఞభావం. దుతియే పమాదన్తి సతివిప్పవాసం. తతియే ఆభిసమాచారికన్తి ఉత్తమసమాచారభూతం వత్తవసేన పణ్ణత్తిసీలం. సేఖధమ్మన్తి సేఖపణ్ణత్తిసీలం. సీలానీతి చత్తారి మహాసీలాని.

౪. సఙ్గణికారామసుత్తవణ్ణనా

౬౮. చతుత్థే సఙ్గణికారామోతి గణసఙ్గణికారామో. సుత్తన్తికగణాదీసు పన గణేసు అత్తనో వా పరిసాసఙ్ఖాతే గణే రమతీతి గణారామో. పవివేకేతి కాయవివేకే. చిత్తస్స నిమిత్తన్తి సమాధివిపస్సనాచిత్తస్స నిమిత్తం సమాధివిపస్సనాకారం. సమ్మాదిట్ఠిన్తి విపస్సనాసమ్మాదిట్ఠిం. సమాధిన్తి మగ్గసమాధిఞ్చేవ ఫలసమాధిఞ్చ. సంయోజనానీతి దస సంయోజనాని. నిబ్బానన్తి అపచ్చయపరినిబ్బానం.

౫. దేవతాసుత్తవణ్ణనా

౬౯. పఞ్చమే సోవచస్సతాతి సుబ్బచభావో. కల్యాణమిత్తతాతి సుచిమిత్తతా. సత్థుగారవోతి సత్థరి గారవయుత్తో. ఏస నయో సబ్బత్థ.

౬. సమాధిసుత్తవణ్ణనా

౭౦. ఛట్ఠే న సన్తేనాతి పచ్చనీకకిలేసేహి అవూపసన్తేన. న పణీతేనాతి న అతప్పకేన. న పటిప్పస్సద్ధిలద్ధేనాతి కిలేసప్పటిప్పస్సద్ధియా అలద్ధేన అప్పత్తేన. న ఏకోదిభావాధిగతేనాతి న ఏకగ్గభావం ఉపగతేన.

౭. సక్ఖిభబ్బసుత్తవణ్ణనా

౭౧. సత్తమే తత్ర తత్రాతి తస్మిం తస్మిం విసేసే. సక్ఖిభబ్బతన్తి పచ్చక్ఖభావం. ఆయతనేతి కారణే. హానభాగియాదయో విసుద్ధిమగ్గే (విసుద్ధి. ౧.౩౯) సంవణ్ణితా. అసక్కచ్చకారీతి న సుకతకారీ, న ఆదరకారీ. అసప్పాయకారీతి న సప్పాయకారీ, న ఉపకారభూతధమ్మకారీ.

౮. బలసుత్తవణ్ణనా

౭౨. అట్ఠమే బలతన్తి బలభావం థామభావం. అసాతచ్చకారీతి న సతతకారీ. సేసం హేట్ఠా వుత్తనయమేవ.

౯-౧౦. తజ్ఝానసుత్తద్వయవణ్ణనా

౭౩-౭౪. నవమే న యథాభూతం సమ్మప్పఞ్ఞాయ సుదిట్ఠో హోతీతి వత్థుకామకిలేసకామేసు ఆదీనవో న యథాసభావతో ఝానపఞ్ఞాయ సుదిట్ఠో హోతి. దసమం ఉత్తానత్థమేవాతి.

దేవతావగ్గో సత్తమో.