౮. అరహత్తవగ్గో

౧. దుక్ఖసుత్తవణ్ణనా

౭౫. అట్ఠమస్స పఠమే సవిఘాతన్తి సఉపఘాతం సోపద్దవం. సపరిళాహన్తి కాయికచేతసికేన పరిళాహేన సపరిళాహం. పాటికఙ్ఖాతి ఇచ్ఛితబ్బా అవస్సంభావినీ.

౨. అరహత్తసుత్తవణ్ణనా

౭౬. దుతియే మానన్తి జాతిఆదీహి మఞ్ఞనం. ఓమానన్తి హీనోహమస్మీతి మానం. అతిమానన్తి అతిక్కమిత్వా పవత్తం అచ్చుణ్ణతిమానం. అధిమానన్తి అధిగతమానం. థమ్భన్తి కోధమానేహి థద్ధభావం. అతినిపాతన్తి హీనస్స హీనోహమస్మీతి మానం.

౩. ఉత్తరిమనుస్సధమ్మసుత్తవణ్ణనా

౭౭. తతియే ఉత్తరిమనుస్సధమ్మాతి మనుస్సధమ్మతో ఉత్తరి. అలమరియఞాణదస్సనవిసేసన్తి అరియభావం కాతుం సమత్థం ఞాణదస్సనవిసేసం, చత్తారో మగ్గే చత్తారి చ ఫలానీతి అత్థో. కుహనన్తి తివిధం కుహనవత్థుం. లపనన్తి లాభత్థికతాయ ఉక్ఖిపిత్వా అవక్ఖిపిత్వా వా లపనం.

౪. సుఖసోమనస్ససుత్తవణ్ణనా

౭౮. చతుత్థే యోని చస్స ఆరద్ధా హోతీతి కారణఞ్చస్స పరిపుణ్ణం పగ్గహితం హోతి. ధమ్మారామోతి ధమ్మే రతిం విన్దతి. భావనాయ రమతి, భావేన్తో వా రమతీతి భావనారామో. పహానే రమతి, పజహన్తో వా రమతీతి పహానారామో. తివిధే పవివేకే రమతీతి పవివేకారామో. అబ్యాపజ్ఝే నిద్దుక్ఖభావే రమతీతి అబ్యాపజ్ఝారామో. నిప్పపఞ్చసఙ్ఖాతే నిబ్బానే రమతీతి నిప్పపఞ్చారామో.

౫. అధిగమసుత్తవణ్ణనా

౭౯. పఞ్చమే న ఆయకుసలోతి న ఆగమనకుసలో. న అపాయకుసలోతి న అపగమనకుసలో. ఛన్దన్తి కత్తుకమ్యతాఛన్దం. న ఆరక్ఖతీతి న రక్ఖతి.

౬. మహన్తత్తసుత్తవణ్ణనా

౮౦. ఛట్ఠే ఆలోకబహులోతి ఞాణాలోకబహులో. యోగబహులోతి యోగే బహులం కరోతి. వేదబహులోతి పీతిపామోజ్జబహులో. అసన్తుట్ఠిబహులోతి కుసలధమ్మేసు అసన్తుట్ఠో. అనిక్ఖిత్తధురోతి అట్ఠపితధురో పగ్గహితవీరియో. ఉత్తరి చ పతారేతీతి సమ్పతి చ ఉత్తరిఞ్చ వీరియం కరోతేవ. సత్తమం ఉత్తానమేవ.

౮-౧౦. దుతియనిరయసుత్తాదివణ్ణనా

౮౨-౮౪. అట్ఠమే పగబ్భోతి కాయపాగబ్భియాదీహి సమన్నాగతో. నవమం ఉత్తానత్థమేవ. దసమే విఘాతవాతి మహిచ్ఛతం నిస్సాయ ఉప్పన్నేన లోభదుక్ఖేన దుక్ఖితో. సేసం సబ్బత్థ ఉత్తానమేవాతి.

అరహత్తవగ్గో అట్ఠమో.