౪. మహామోగ్గల్లానసుత్తవణ్ణనా

౩౪. చతుత్థే తిస్సో నామ భిక్ఖూతి థేరస్సేవ సద్ధివిహారికో. మహిద్ధికో మహానుభావోతి ఇజ్ఝనట్ఠేన మహతీ ఇద్ధి అస్సాతి మహిద్ధికో. అనుఫరణట్ఠేన మహా ఆనుభావో అస్సాతి మహానుభావో. చిరస్సం ఖో, మారిస మోగ్గల్లాన, ఇమం పరియాయమకాసీతి ఏవరూపం లోకే పకతియా పియసముదాహారవచనం హోతి. లోకియా హి చిరస్సం ఆగతమ్పి అనాగతపుబ్బమ్పి మనాపజాతియం ఆగతం దిస్వా ‘‘కుతో భవం ఆగతో, చిరస్సం భవం ఆగతో, కథం తే ఇధాగమనమగ్గో ఞాతో, కిం మగ్గమూళ్హోసీ’’తిఆదీని వదన్తి. అయం పన ఆగతపుబ్బత్తాయేవ ఏవమాహ. థేరో హి కాలేన కాలం బ్రహ్మలోకం గచ్ఛతియేవ. తత్థ పరియాయమకాసీతి వారం అకాసి. యదిదం ఇధాగమనాయాతి యో అయం ఇధాగమనాయ వారో, తం చిరస్సం అకాసీతి వుత్తం హోతి. ఇదమాసనం పఞ్ఞత్తన్తి మహారహం బ్రహ్మపల్లఙ్కం పఞ్ఞాపేత్వా ఏవమాహ. అవేచ్చప్పసాదేనాతి అధిగతేన అచలేన మగ్గప్పసాదేన. ఇమస్మిం సుత్తే సోతాపత్తిమగ్గఞాణం కథితం.