౭. పఠమసమయసుత్తవణ్ణనా

౨౭. సత్తమే మనోభావనీయస్సాతి ఏత్థ మనం భావేతి వడ్ఢేతీతి మనోభావనీయో. దస్సనాయాతి దస్సనత్థం. నిస్సరణన్తి నిగ్గమనం వూపసమనం. ధమ్మం దేసేతీతి కామరాగప్పజహనత్థాయ అసుభకమ్మట్ఠానం కథేతి. దుతియవారాదీసు బ్యాపాదప్పహానాయ మేత్తాకమ్మట్ఠానం, థినమిద్ధప్పహానాయ థినమిద్ధవినోదనకమ్మట్ఠానం, ఆలోకసఞ్ఞం వా వీరియారమ్భవత్థుఆదీనం వా అఞ్ఞతరం, ఉద్ధచ్చకుక్కుచ్చప్పహానాయ సమథకమ్మట్ఠానం, విచికిచ్ఛాపహానాయ తిణ్ణం రతనానం గుణకథం కథేన్తో ధమ్మం దేసేతీతి వేదితబ్బో. ఆగమ్మాతి ఆరబ్భ. మనసికరోతోతి ఆరమ్మణవసేన చిత్తే కరోన్తస్స. అనన్తరా ఆసవానం ఖయో హోతీతి అనన్తరాయేన ఆసవానం ఖయో హోతి.