(౨౨) ౨. అక్కోసకవగ్గో

౧. అక్కోసకసుత్తవణ్ణనా

౨౧౧. దుతియస్స పఠమే అక్కోసకపరిభాసకోతి దసహి అక్కోసవత్థూహి అక్కోసకో, భయదస్సనేన పరిభాసకో. ఛిన్నపరిపన్థోతి లోకుత్తరపరిపన్థస్స ఛిన్నత్తా ఛిన్నపరిపన్థో. రోగాతఙ్కన్తి రోగోయేవ కిచ్ఛజీవికాయావహనతో రోగాతఙ్కో నామ.

౨. భణ్డనకారకసుత్తవణ్ణనా

౨౧౨. దుతియే అధికరణకారకోతి చతున్నం అధికరణానం అఞ్ఞతరస్స కారకో. అనధిగతన్తి పుబ్బే అప్పత్తవిసేసం.

౩. సీలసుత్తవణ్ణనా

౨౧౩. తతియే దుస్సీలోతి అసీలో నిస్సీలో. సీలవిపన్నోతి విపన్నసీలో భిన్నసంవరో. పమాదాధికరణన్తి పమాదకారణా. ఇదఞ్చ సుత్తం గహట్ఠానం వసేన ఆగతం, పబ్బజితానమ్పి పన లబ్భతేవ. గహట్ఠో హి యేన యేన సిప్పట్ఠానేన జీవికం కప్పేతి, యది కసియా, యది వణిజ్జాయ, పాణాతిపాతాదివసేన పమత్తో తం తం యథాకాలం సమ్పాదేతుం న సక్కోతి, అథస్స మూలం వినస్సతి. మాఘాతకాలేపి పాణాతిపాతం అదిన్నాదానాదీని చ కరోన్తో దణ్డవసేన మహతిం భోగజానిం నిగచ్ఛతి. పబ్బజితో దుస్సీలో పమాదకారణా సీలతో బుద్ధవచనతో ఝానతో సత్తఅరియధనతో చ జానిం నిగచ్ఛతి. గహట్ఠస్స ‘‘అసుకో అసుకకులే జాతో దుస్సీలో పాపధమ్మో పరిచ్చత్తఇధలోకపరలోకో సలాకభత్తమత్తమ్పి న దేతీ’’తి చతుపరిసమజ్ఝే పాపకో కిత్తిసద్దో అబ్భుగ్గచ్ఛతి. పబ్బజితస్స ‘‘అసుకో నాసక్ఖి సీలం రక్ఖితుం బుద్ధవచనం గహేతుం, వేజ్జకమ్మాదీహి జీవతి, ఛహి అగారవేహి సమన్నాగతో’’తి ఏవం అబ్భుగ్గచ్ఛతి.

అవిసారదోతి గహట్ఠో తావ ‘‘అవస్సం బహూనం సన్నిపాతట్ఠానే కోచి మమ కమ్మం జానిస్సతి, అథ మం నిగ్గణ్హిస్సన్తి వా, రాజకులస్స వా దస్సన్తీ’’తి సభయో ఉపసఙ్కమతి. మఙ్కుభూతో చ పతితక్ఖన్ధో అధోముఖో అఙ్గుట్ఠకేన భూమిం కసన్తో నిసీదతి, విసారదో హుత్వా కథేతుం న సక్కోతి. పబ్బజితోపి ‘‘బహూ భిక్ఖూ సన్నిపతితా, అవస్సం కోచి మమ కమ్మం జానిస్సతి, అథ మే ఉపోసథమ్పి పవారణమ్పి ఠపేత్వా సామఞ్ఞా చావేత్వా నిక్కడ్ఢిస్సన్తీ’’తి సభయో ఉపసఙ్కమతి, విసారదో హుత్వా కథేతుం న సక్కోతి. ఏకచ్చో పన దుస్సీలోపి దప్పితో వియ చరతి, సోపి అజ్ఝాసయేన మఙ్కు హోతియేవ.

సమ్మూళ్హో కాలం కరోతీతి తస్స హి మరణమఞ్చే నిపన్నస్స దుస్సీలకమ్మం సమాదాయ వత్తితట్ఠానం ఆపాథం ఆగచ్ఛతి. సో ఉమ్మీలేత్వా ఇధలోకం పస్సతి, నిమ్మీలేత్వా పరలోకం. తస్స చత్తారో అపాయా ఉపట్ఠహన్తి, సత్తిసతేన సీసే పహరియమానో వియ హోతి. సో ‘‘వారేథ వారేథా’’తి విరవన్తో మరతి. తేన వుత్తం – ‘‘సమ్మూళ్హో కాలం కరోతీ’’తి. పఞ్చమపదం ఉత్తానమేవ. ఆనిసంసకథా వుత్తవిపరియాయేన వేదితబ్బా.

౪. బహుభాణిసుత్తవణ్ణనా

౨౧౪. చతుత్థే బహుభాణిస్మిన్తి పఞ్ఞాయ అపరిచ్ఛిన్దిత్వా బహుం భణన్తే. మన్తభాణిస్మిన్తి మన్తా వుచ్చతి పఞ్ఞా, తాయ పరిచ్ఛిన్దిత్వా భణన్తే.

౫. పఠమఅక్ఖన్తిసుత్తవణ్ణనా

౨౧౫. పఞ్చమే వేరబహులోతి పుగ్గలవేరేనపి అకుసలవేరేనపి బహువేరో. వజ్జబహులోతి దోసబహులో.

౬. దుతియఅక్ఖన్తిసుత్తవణ్ణనా

౨౧౬. ఛట్ఠే లుద్దోతి దారుణో కక్ఖళో. విప్పటిసారీతి మఙ్కుభావేన సమన్నాగతో.

౭.పఠమఅపాసాదికసుత్తవణ్ణనా

౨౧౭. సత్తమే అపాసాదికేతి అపాసాదికేహి కాయకమ్మాదీహి సమన్నాగతే. పాసాదికేతి పసాదావహే పరిసుద్ధసమాచారే. అట్ఠమనవమాని ఉత్తానత్థానేవ.

౧౦. మధురాసుత్తవణ్ణనా

౨౨౦. దసమే పఞ్చిమే, భిక్ఖవే, ఆదీనవా మధురాయన్తి ఏకం సమయం భగవా భిక్ఖుసఙ్ఘపరివుతో చారికం చరమానో మధురానగరం సమ్పాపుణిత్వా అన్తోనగరం పవిసితుం ఆరభి. అథేకా మిచ్ఛాదిట్ఠికా యక్ఖినీ అచేలా హుత్వా ద్వే హత్థే పసారేత్వా జివ్హం నిల్లాలేత్వా దసబలస్స పురతో అట్ఠాసి. సత్థా అన్తోనగరం అప్పవిసిత్వా తతోవ నిక్ఖమిత్వా విహారం అగమాసి. మహాజనో ఖాదనీయభోజనీయఞ్చేవ సక్కారసమ్మానఞ్చ ఆదాయ విహారం గన్త్వా బుద్ధప్పముఖస్స భిక్ఖుసఙ్ఘస్స దానం అదాసి. సత్థా తస్స నగరస్స నిగ్గణ్హనత్థాయ ఇమం సుత్తం ఆరభి. తత్థ విసమాతి న సమతలా. బహురజాతి వాతపహరణకాలే ఉద్ధతేన రజక్ఖన్ధేన పరియోనద్ధా వియ హోతి. సేసం సబ్బత్థ ఉత్తానమేవాతి.

అక్కోసకవగ్గో దుతియో.