౧. ఆరఞ్ఞికసుత్తవణ్ణనా

౧౮౧. చతుత్థస్స పఠమే మన్దత్తా మోమూహత్తాతి నేవ సమాదానం జానాతి, న ఆనిసంసం. అత్తనో పన మన్దత్తా మోమూహత్తా అఞ్ఞాణేనేవ ఆరఞ్ఞకో హోతి. పాపిచ్ఛో ఇచ్ఛాపకతోతి ‘‘అరఞ్ఞే మే విహరన్తస్స ‘అయం ఆరఞ్ఞకో’తి చతుపచ్చయసక్కారం కరిస్సన్తి, ‘అయం భిక్ఖు లజ్జీ పవివిత్తో’తిఆదీహి చ గుణేహి సమ్భావేస్సన్తీ’’తి ఏవం పాపికాయ ఇచ్ఛాయ ఠత్వా తాయ ఏవ ఇచ్ఛాయ అభిభూతో హుత్వా ఆరఞ్ఞకో హోతి. ఉమ్మాదవసేన అరఞ్ఞం పవిసిత్వా విహరన్తో పన ఉమ్మాదా చిత్తక్ఖేపా ఆరఞ్ఞకో నామ హోతి. వణ్ణితన్తి ఇదం ఆరఞ్ఞకఙ్గం నామ బుద్ధేహి చ బుద్ధసావకేహి చ వణ్ణితం పసత్థన్తి ఆరఞ్ఞకో హోతి. ఇదమత్థితన్తి ఇమాయ కల్యాణాయ పటిపత్తియా అత్థో ఏతస్సాతి ఇదమత్థీ, ఇదమత్థినో భావో ఇదమత్థితా. తం ఇదమత్థితంయేవ నిస్సాయ, న అఞ్ఞం కిఞ్చి లోకామిసన్తి అత్థో. సేసమేత్థ ఇతో పరేసు చ ఉత్తానత్థమేవ.

అరఞ్ఞవగ్గో చతుత్థో.