౧. అననుస్సుతసుత్తవణ్ణనా

౧౧. దుతియస్స పఠమే పుబ్బాహం, భిక్ఖవే, అననుస్సుతేసు ధమ్మేసూతి అహం, భిక్ఖవే, పుబ్బే అననుస్సుతేసు చతూసు సచ్చధమ్మేసు. అభిఞ్ఞావోసానపారమిప్పత్తో పటిజానామీతి చతూసు సచ్చేసు చతూహి మగ్గేహి సోళసవిధస్స కిచ్చస్స కరణేన అభిజానిత్వా వోసానపారమిం సబ్బేసం కిచ్చానం నిట్ఠితత్తా కతకిచ్చభావం పారం పత్తో పటిజానామీతి మహాబోధిపల్లఙ్కే అత్తనో ఆగమనీయగుణం దస్సేతి. తథాగతస్సాతి అట్ఠహి కారణేహి తథాగతస్స. తథాగతబలానీతి యథా తేహి గన్తబ్బం, తథేవ గతాని పవత్తాని ఞాణబలాని. ఆసభం ఠానన్తి సేట్ఠట్ఠానం. సీహనాదన్తి అభీతనాదం. బ్రహ్మచక్కన్తి సేట్ఠచక్కం. పవత్తేతీతి కథేతి.