౪. దుతియనానాకరణసుత్తవణ్ణనా

౧౨౪. చతుత్థే రూపమేవ రూపగతం. సేసపదేసుపి ఏసేవ నయో. అనిచ్చతోతిఆదీసు హుత్వా అభావట్ఠేన అనిచ్చతో, ఆబాధట్ఠేన రోగతో, అన్తో పదుస్సనట్ఠేన గణ్డతో, అనుపవిట్ఠట్ఠేన సల్లతో, సదుక్ఖట్ఠేన అఘతో, సమ్పీళనట్ఠేన ఆబాధతో, అవిధేయ్యట్ఠేన పరతో, పలుజ్జనట్ఠేన పలోకతో, నిస్సత్తట్ఠేన సుఞ్ఞతో, అవసవత్తనట్ఠేన అనత్తతో. ఏత్థ చ ‘‘అనిచ్చతో పలోకతో’’తి ద్వీహి పదేహి అనిచ్చలక్ఖణం కథితం, ‘‘సుఞ్ఞతో అనత్తతో’’తి ద్వీహి అనత్తలక్ఖణం, సేసేహి దుక్ఖలక్ఖణం కథితన్తి వేదితబ్బం. సమనుపస్సతీతి ఞాణేన పస్సతి. ఏవం పఞ్చక్ఖన్ధే తిలక్ఖణం ఆరోపేత్వా పస్సన్తో తయో మగ్గే తీణి ఫలాని సచ్ఛికరోతి. సుద్ధావాసానం దేవానం సహబ్యతం ఉపపజ్జతీతి తత్థ ఠితో చతుత్థజ్ఝానం భావేత్వా ఉపపజ్జతి.