౫. ఛవాలాతసుత్తవణ్ణనా

౯౫. పఞ్చమే ఛవాలాతన్తి సుసానే అలాతం. మజ్ఝే గూథగతన్తి మజ్ఝట్ఠానే గూథమక్ఖితం. నేవ గామే కట్ఠత్థం ఫరతీతి కూటగోపానసిథమ్భసోపానాదీనం అత్థాయ అనుపనేయ్యతాయ గామే న కట్ఠత్థం సాధేతి, ఖేత్తకుటిపాదం వా మఞ్చపాదం వా కాతుం అనుపనేయ్యతాయ న అరఞ్ఞే కట్ఠత్థం సాధేతి. ద్వీసు కోటీసు గయ్హమానం హత్థం డహతి, మజ్ఝే గయ్హమానం గూథేన మక్ఖేతి. తథూపమన్తి తంసరిక్ఖకం. అభిక్కన్తతరోతి సున్దరతరో. పణీతతరోతి ఉత్తమతరో. గవా ఖీరన్తి గావితో ఖీరం. ఖీరమ్హా దధీతిఆదీసు పరం పరం పురిమతో పురిమతో అగ్గం, సప్పిమణ్డో పన తేసు సబ్బేసుపి అగ్గమేవ. అగ్గోతిఆదీసు గుణేహి అగ్గో చేవ సేట్ఠో చ పముఖో చ ఉత్తమో చ పవరో చాతి వేదితబ్బో. ఛవాలాతూపమాయ న దుస్సీలో పుగ్గలో కథితో, అప్పస్సుతో పన విస్సట్ఠకమ్మన్తో గోణసదిసో పుగ్గలో కథితోతి వేదితబ్బో. ఛట్ఠే సబ్బం ఉత్తానత్థమేవ.