౧. చక్కసుత్తవణ్ణనా

౩౧. చతుత్థస్స పఠమే చక్కానీతి సమ్పత్తియో. చతుచక్కం వత్తతీతి చత్తారి సమ్పత్తిచక్కాని వత్తన్తి ఘటియన్తియేవాతి అత్థో. పతిరూపదేసవాసోతి యత్థ చతస్సో పరిసా సన్దిస్సన్తి, ఏవరూపే అనుచ్ఛవికే దేసే వాసో. సప్పురిసావస్సయోతి బుద్ధాదీనం సప్పురిసానం అవస్సయనం సేవనం భజనం, న రాజానం. అత్తసమ్మాపణిధీతి అత్తనో సమ్మా ఠపనం, సచే పుబ్బే అస్సద్ధాదీహి సమన్నాగతో హోతి, తాని పహాయ సద్ధాదీసు పతిట్ఠాపనం. పుబ్బే చ కతపుఞ్ఞతాతి పుబ్బే ఉపచితకుసలతా. ఇదమేవ చేత్థ పమాణం. యేన హి ఞాణసమ్పయుత్తచిత్తేన కుసలకమ్మం కతం హోతి, తదేవ కుసలం తం పురిసం పతిరూపదేసే ఉపనేతి, సప్పురిసే భజాపేతి, సో ఏవ చ పుగ్గలో అత్తానం సమ్మా ఠపేతి. పుఞ్ఞకతోతి కతపుఞ్ఞో. సుఖఞ్చేతంధివత్తతీతి సుఖఞ్చ ఏతం పుగ్గలం అధివత్తతి, అవత్థరతీతి అత్థో.