౨. సఙ్గహసుత్తవణ్ణనా

౩౨. దుతియే సఙ్గహవత్థూనీతి సఙ్గణ్హనకారణాని. దానఞ్చాతిఆదీసు ఏకచ్చో హి దానేనేవ సఙ్గణ్హితబ్బో హోతి, తస్స దానమేవ దాతబ్బం. పేయ్యవజ్జన్తి పియవచనం. ఏకచ్చో హి ‘‘అయం దాతబ్బం నామ దేతి, ఏకేకేన పన వచనేన సబ్బం మక్ఖేత్వా నాసేతి, కిం తస్స దాన’’న్తి వత్తా హోతి. ఏకచ్చో ‘‘అయం కిఞ్చాపి దానం న దేతి, కథేన్తో పన తేలేన వియ మక్ఖేతి. ఏస దేతు వా మా వా, వచనమేవస్స సహస్సం అగ్ఘతీ’’తి వత్తా హోతి. ఏవరూపో పుగ్గలో దానం న పచ్చాసీసతి, పియవచనమేవ పచ్చాసీసతి. తస్స పియవచనమేవ వత్తబ్బం. అత్థచరియాతి అత్థవడ్ఢనకథా. ఏకచ్చో హి నేవ దానం, న పియవచనం పచ్చాసీసతి, అత్తనో హితకథం వడ్ఢికథమేవ పచ్చాసీసతి. ఏవరూపస్స పుగ్గలస్స ‘‘ఇదం తే కాతబ్బం, ఇదం న కాతబ్బం, ఏవరూపో పుగ్గలో సేవితబ్బో, ఏవరూపో న సేవితబ్బో’’తి ఏవం అత్థచరియకథావ కథేతబ్బా. సమానత్తతాతి సమానసుఖదుక్ఖభావో. ఏకచ్చో హి దానాదీసు ఏకమ్పి న పచ్చాసీసతి, ఏకాసనే నిసజ్జం, ఏకపల్లఙ్కే సయనం, ఏకతో భోజనన్తి ఏవం సమానసుఖదుక్ఖతం పచ్చాసీసతి. సో సచే గహట్ఠస్స జాతియా పబ్బజితస్స సీలేన సదిసో హోతి, తస్సాయం సమానత్తతా కాతబ్బా. తత్థ తత్థ యథారహన్తి తేసు తేసు ధమ్మేసు యథానుచ్ఛవికం సమానత్తతాతి అత్థో. రథస్సాణీవ యాయతోతి యథా రథస్స గచ్ఛతో ఆణి సఙ్గహో నామ హోతి, సా రథం సఙ్గణ్హాతి, ఏవమిమే సఙ్గహా లోకం సఙ్గణ్హన్తి. న మాతా పుత్తకారణాతి యది మాతా ఏతే సఙ్గహే పుత్తస్స న కరేయ్య, పుత్తకారణా మానం వా పూజం వా న లభేయ్య. సఙ్గహా ఏతేతి ఉపయోగవచనే పచ్చత్తం. సఙ్గహే ఏతేతి వా పాఠో. సమవేక్ఖన్తీతి సమ్మా పేక్ఖన్తి. పాసంసా చ భవన్తీతి పసంసనీయా చ భవన్తి.