౩. పఠమఖతసుత్తవణ్ణనా

౩. తతియం దుకనిపాతవణ్ణనాయం వుత్తమేవ. గాథాసు పన నిన్దియన్తి నిన్దితబ్బయుత్తకం. నిన్దతీతి గరహతి. పసంసియోతి పసంసితబ్బయుత్తో. విచినాతి ముఖేన సో కలిన్తి యో ఏవం పవత్తో, తేన ముఖేన కలిం విచినాతి నామ. కలినా తేన సుఖం న విన్దతీతి తేన చ కలినా సుఖం న పటిలభతి. సబ్బస్సాపి సహాపి అత్తనాతి సబ్బేనపి సకేన ధనేన చేవ అత్తనా చ సద్ధిం యో పరాజయో, సో అప్పమత్తకోవ కలీతి అత్థో. యో సుగతేసూతి యో పన సమ్మగ్గతేసు పుగ్గలేసు చిత్తం పదుస్సేయ్య, అయం చిత్తపదోసోవ తతో కలితో మహన్తతరో కలి. ఇదాని తస్స మహన్తతరభావం దస్సేన్తో సతం సహస్సానన్తిఆదిమాహ. తత్థ సతం సహస్సానన్తి నిరబ్బుదగణనాయ సతసహస్సం. ఛత్తింసతీతి అపరాని చ ఛత్తింసతి నిరబ్బుదాని. పఞ్చ చాతి అబ్బుదగణనాయ చ పఞ్చ అబ్బుదాని. యమరియగరహీతి యం అరియే గరహన్తో నిరయం ఉపపజ్జతి, తత్థ ఏత్తకం ఆయుప్పమాణన్తి.