౧. అనుబుద్ధసుత్తవణ్ణనా

౧. చతుక్కనిపాతస్స పఠమే అననుబోధాతి అబుజ్ఝనేన అజాననేన. అప్పటివేధాతి అప్పటివిజ్ఝనేన అపచ్చక్ఖకిరియాయ. దీఘమద్ధానన్తి చిరకాలం. సన్ధావితన్తి భవతో భవం గమనవసేన సన్ధావితం. సంసరితన్తి పునప్పునం గమనాగమనవసేన సంసరితం. మమఞ్చేవ తుమ్హాకఞ్చాతి మయా చ తుమ్హేహి చ. అథ వా సన్ధావితం సంసరితన్తి సన్ధావనం సంసరణం మమఞ్చేవ తుమ్హాకఞ్చ అహోసీతి ఏవమేత్థ అత్థో వేదితబ్బో. అరియస్సాతి నిద్దోసస్స. సీలం సమాధి పఞ్ఞాతి ఇమే పన తయో ధమ్మా మగ్గఫలసమ్పయుత్తావ వేదితబ్బా, విముత్తినామేన ఫలమేవ నిద్దిట్ఠం. భవతణ్హాతి భవేసు తణ్హా. భవనేత్తీతి భవరజ్జు. తణ్హాయ ఏవ ఏతం నామం. తాయ హి సత్తా గోణా వియ గీవాయ బన్ధిత్వా తం తం భవం నీయన్తి, తస్మా భవనేత్తీతి వుచ్చతి.

అనుత్తరాతి లోకుత్తరా. దుక్ఖస్సన్తకరోతి వట్టదుక్ఖస్స అన్తకరో. చక్ఖుమాతి పఞ్చహి చక్ఖూహి చక్ఖుమా. పరినిబ్బుతోతి కిలేసపరినిబ్బానేన పరినిబ్బుతో. ఇదమస్స బోధిమణ్డే పఠమపరినిబ్బానం, పచ్ఛా పన యమకసాలానమన్తరే అనుపాదిసేసాయ నిబ్బానధాతుయా పరినిబ్బుతోతి యథానుసన్ధినా దేసనం నిట్ఠాపేసి.