౪. రాగపేయ్యాలం

౨౩౧. రాగస్స, భిక్ఖవే, అభిఞ్ఞాయాతి పఞ్చకామగుణికరాగస్స అభిజాననత్థం పచ్చక్ఖకరణత్థం. పరిఞ్ఞాయాతి పరిజాననత్థం. పరిక్ఖయాయాతి పరిక్ఖయగమనత్థం. పహానాయాతి పజహనత్థం. ఖయాయ వయాయాతి ఖయవయగమనత్థం. విరాగాయాతి విరజ్జనత్థం. నిరోధాయాతి నిరుజ్ఝనత్థం. చాగాయాతి చజనత్థం. పటినిస్సగ్గాయాతి పటినిస్సజ్జనత్థం.

౨౩౨-౨౪౬. థమ్భస్సాతి కోధమానవసేన థద్ధభావస్స. సారబ్భస్సాతి కారణుత్తరియలక్ఖణస్స సారబ్భస్స. మానస్సాతి నవవిధమానస్స. అతిమానస్సాతి అతిక్కమిత్వా మఞ్ఞనమానస్స. మదస్సాతి మజ్జనాకారమదస్స. పమాదస్సాతి సతివిప్పవాసస్స, పఞ్చసు కామగుణేసు చిత్తవోస్సగ్గస్స. సేసం సబ్బత్థ ఉత్తానత్థమేవాతి.

రాగపేయ్యాలం నిట్ఠితం.