౩. వినయపేయ్యాలం

౨౦౧. ద్వేమే, భిక్ఖవే, అత్థవసే పటిచ్చాతి, భిక్ఖవే, ద్వే అత్థే నిస్సాయ ద్వే కారణాని సన్ధాయ. సిక్ఖాపదం పఞ్ఞత్తన్తి సిక్ఖాకోట్ఠాసో ఠపితో. సఙ్ఘసుట్ఠుతాయాతి సఙ్ఘస్స సుట్ఠుభావాయ, ‘‘సుట్ఠు, భన్తే’’తి వత్వా సమ్పటిచ్ఛనత్థాయాతి అత్థో. సఙ్ఘఫాసుతాయాతి సఙ్ఘస్స ఫాసువిహారత్థాయ. దుమ్మఙ్కూనన్తి దుస్సీలానం. పేసలానన్తి పీయసీలానం. దిట్ఠధమ్మికానం ఆసవానన్తి దిట్ఠధమ్మే ఇమస్మింయేవ అత్తభావే వీతిక్కమపచ్చయా పటిలద్ధబ్బానం వధబన్ధనాదిదుక్ఖధమ్మసఙ్ఖాతానం ఆసవానం. సంవరాయాతి పిదహనత్థాయ. సమ్పరాయికానన్తి తథారూపానంయేవ అపాయదుక్ఖసఙ్ఖాతానం సమ్పరాయే ఉప్పజ్జనకఆసవానం. పటిఘాతాయాతి పటిసేధనత్థాయ. వేరానన్తి అకుసలవేరానమ్పి పుగ్గలవేరానమ్పి. వజ్జానన్తి దోసానం. తే ఏవ వా దుక్ఖధమ్మా వజ్జనీయత్తా ఇధ వజ్జాతి అధిప్పేతా. భయానన్తి చిత్తుత్రాసభయానమ్పి భయహేతూనం తేసంయేవ దుక్ఖధమ్మానమ్పి. అకుసలానన్తి అక్ఖమట్ఠేన అకుసలసఙ్ఖాతానం దుక్ఖధమ్మానం. గిహీనం అనుకమ్పాయాతి గిహీసు ఉజ్ఝాయన్తేసు పఞ్ఞత్తసిక్ఖాపదం గిహీనం అనుకమ్పాయ పఞ్ఞత్తం నామ. పాపిచ్ఛానం పక్ఖుపచ్ఛేదాయాతి పాపిచ్ఛా పక్ఖం నిస్సాయ సఙ్ఘం భిన్దేయ్యున్తి తేసం పక్ఖుపచ్ఛేదనత్థాయ. అప్పసన్నానం పసాదాయాతి పుబ్బే అప్పసన్నానమ్పి పణ్డితమనుస్సానం సిక్ఖాపదపఞ్ఞత్తిసమ్పదం దిస్వా పసాదుప్పత్తిఅత్థాయ. పసన్నానం భియ్యోభావాయాతి పసన్నానం ఉపరూపరిపసాదభావాయ. సద్ధమ్మట్ఠితియాతి సద్ధమ్మస్స చిరట్ఠితత్థం. వినయానుగ్గహాయాతి పఞ్చవిధస్సాపి వినయస్స అనుగ్గణ్హనత్థాయ.

౨౦౨-౨౩౦. పాతిమోక్ఖం పఞ్ఞత్తన్తి భిక్ఖుపాతిమోక్ఖం భిక్ఖునిపాతిమోక్ఖన్తి దువిధం పాతిమోక్ఖం పఞ్ఞత్తం. పాతిమోక్ఖుద్దేసోతి భిక్ఖూనం పఞ్చ, భిక్ఖునీనం చత్తారోతి నవ పాతిమోక్ఖుద్దేసా పఞ్ఞత్తా. పాతిమోక్ఖట్ఠపనన్తి ఉపోసథట్ఠపనం. పవారణా పఞ్ఞత్తాతి చాతుద్దసికా పన్నరసికాతి ద్వే పవారణా పఞ్ఞత్తా. పవారణట్ఠపనం పఞ్ఞత్తన్తి సాపత్తికస్స భిక్ఖునో పవారణా ఉత్తియా వత్తమానాయ పవారణట్ఠపనం పఞ్ఞత్తం. తజ్జనీయకమ్మాదీసు భిక్ఖూ వాచాసత్తీహి వితుదన్తానం పణ్డుకలోహితకానం భిక్ఖూనం తజ్జనీయకమ్మం (చూళవ. ౧ ఆదయో) పఞ్ఞత్తం. బాలస్స అబ్యత్తస్స సేయ్యసకస్స భిక్ఖునో నియస్సకమ్మం పఞ్ఞత్తం. కులదూసకే అస్సజిపునబ్బసుకే భిక్ఖూ ఆరబ్భ పబ్బాజనీయకమ్మం (చూళవ. ౨౧ ఆదయో) పఞ్ఞత్తం. గిహీనం అక్కోసకస్స సుధమ్మత్థేరస్స పటిసారణీయకమ్మం (చూళవ. ౩౩ ఆదయో) పఞ్ఞత్తం. ఆపత్తియా అదస్సనాదీసు ఉక్ఖేపనీయకమ్మం పఞ్ఞత్తం. గరుకాపత్తిం ఆపన్నస్స పటిచ్ఛన్నాయ ఆపత్తియా పరివాసదానం పఞ్ఞత్తం. పరివాసే అన్తరాపత్తిం ఆపన్నస్స మూలాయ పటికస్సనం పఞ్ఞత్తం. పటిచ్ఛన్నాయపి అప్పటిచ్ఛన్నాయపి ఆపత్తియా మానత్తదానం పఞ్ఞత్తం. చిణ్ణమానత్తస్స అబ్భానం పఞ్ఞత్తం. సమ్మా వత్తన్తస్స ఓసారణీయం పఞ్ఞత్తం. అసమ్మావత్తనాదీసు నిస్సారణీయం పఞ్ఞత్తం.

ఏహిభిక్ఖూపసమ్పదా సరణగమనూపసమ్పదా ఓవాదూపసమ్పదా పఞ్హాబ్యాకరణూపసమ్పదా ఞత్తిచతుత్థకమ్మూపసమ్పదా గరుధమ్మూపసమ్పదా ఉభతోసఙ్ఘే ఉపసమ్పదా దూతేన ఉపసమ్పదాతి అట్ఠవిధా ఉపసమ్పదా పఞ్ఞత్తా. ఞత్తికమ్మం నవ ఠానాని గచ్ఛతీతి ఏవం నవట్ఠానికం ఞత్తికమ్మం పఞ్ఞత్తం. ఞత్తిదుతియకమ్మం సత్త ఠానాని గచ్ఛతీతి ఏవం సత్తట్ఠానికమేవ ఞత్తిదుతియకమ్మం పఞ్ఞత్తం. ఞత్తిచతుత్థకమ్మం సత్త ఠానాని గచ్ఛతీతి ఏవం సత్తట్ఠానికమేవ ఞత్తిచతుత్థకమ్మం పఞ్ఞత్తం. పఠమపారాజికాదీనం పఠమపఞ్ఞత్తి అపఞ్ఞత్తే పఞ్ఞత్తం. తేసంయేవ అనుపఞ్ఞత్తి పఞ్ఞత్తే అనుపఞ్ఞత్తం. ధమ్మసమ్ముఖతా వినయసమ్ముఖతా సఙ్ఘసమ్ముఖతా పుగ్గలసమ్ముఖతాతి ఇమస్స చతుబ్బిధస్స సమ్ముఖీభావస్స వసేన సమ్ముఖావినయో పఞ్ఞత్తో. సతివేపుల్లప్పత్తస్స ఖీణాసవస్స అచోదనత్థాయ సతివినయో పఞ్ఞత్తో. ఉమ్మత్తకస్స భిక్ఖునో అమూళ్హవినయో పఞ్ఞత్తో. అప్పటిఞ్ఞాయ చుదితకస్స ఆపత్తియా అతరణత్థం పటిఞ్ఞాతకరణం పఞ్ఞత్తం. బహుతరానం ధమ్మవాదీనం లద్ధిం గహేత్వా అధికరణవూపసమనత్థం. యేభుయ్యసికా పఞ్ఞత్తా. పాపుస్సన్నస్స పుగ్గలస్స నిగ్గణ్హనత్థం తస్సపాపియసికా పఞ్ఞత్తా. భణ్డనాదివసేన బహుం అస్సామణకం కత్వా ఆపత్తిం ఆపన్నానం భిక్ఖూనం ఠపేత్వా థుల్లవజ్జం ఠపేత్వా గిహిపటిసంయుత్తఞ్చ అవసేసాపత్తీనం వూపసమనత్థాయ తిణవత్థారకో పఞ్ఞత్తో.

వినయపేయ్యాలం నిట్ఠితం.