(౫) నిరోధవారో

౧౧౧. (క) యస్స యం చిత్తం నిరుజ్ఝతి తస్స తం చిత్తం నిరుజ్ఝిత్థాతి? నో.

(ఖ) యస్స వా పన యం చిత్తం నిరుజ్ఝిత్థ తస్స తం చిత్తం నిరుజ్ఝతీతి? నో.

(క) యస్స యం చిత్తం న నిరుజ్ఝతి తస్స తం చిత్తం న నిరుజ్ఝిత్థాతి?

అతీతం చిత్తం న నిరుజ్ఝతి, నో చ తస్స తం చిత్తం న నిరుజ్ఝిత్థ. ఉప్పాదక్ఖణే అనాగతఞ్చ చిత్తం న చేవ నిరుజ్ఝతి న చ నిరుజ్ఝిత్థ.

(ఖ) యస్స వా పన యం చిత్తం న నిరుజ్ఝిత్థ తస్స తం చిత్తం న నిరుజ్ఝతీతి?

భఙ్గక్ఖణే చిత్తం న నిరుజ్ఝిత్థ, నో చ తస్స తం చిత్తం న నిరుజ్ఝతి. ఉప్పాదక్ఖణే అనాగతఞ్చ చిత్తం న చేవ నిరుజ్ఝిత్థ న చ నిరుజ్ఝతి.

౧౧౨. (క) యస్స యం చిత్తం నిరుజ్ఝతి తస్స తం చిత్తం నిరుజ్ఝిస్సతీతి? నో.

(ఖ) యస్స వా పన యం చిత్తం నిరుజ్ఝిస్సతి తస్స తం చిత్తం నిరుజ్ఝతీతి? నో.

(క) యస్స యం చిత్తం న నిరుజ్ఝతి తస్స తం చిత్తం న నిరుజ్ఝిస్సతీతి?

ఉప్పాదక్ఖణే అనాగతఞ్చ చిత్తం న నిరుజ్ఝతి, నో చ తస్స తం చిత్తం న నిరుజ్ఝిస్సతి. అతీతం చిత్తం న చేవ నిరుజ్ఝతి న చ నిరుజ్ఝిస్సతి.

(ఖ) యస్స వా పన యం చిత్తం న నిరుజ్ఝిస్సతి తస్స తం చిత్తం న నిరుజ్ఝతీతి?

భఙ్గక్ఖణే చిత్తం న నిరుజ్ఝిస్సతి, నో చ తస్స తం చిత్తం న నిరుజ్ఝతి. అతీతం చిత్తం న చేవ నిరుజ్ఝిస్సతి న చ నిరుజ్ఝతి.

౧౧౩. (క) యస్స యం చిత్తం నిరుజ్ఝిత్థ తస్స తం చిత్తం నిరుజ్ఝిస్సతీతి? నో.

(ఖ) యస్స వా పన యం చిత్తం నిరుజ్ఝిస్సతి తస్స తం చిత్తం నిరుజ్ఝిత్థాతి? నో.

(క) యస్స యం చిత్తం న నిరుజ్ఝిత్థ తస్స తం చిత్తం న నిరుజ్ఝిస్సతీతి?

ఉప్పాదక్ఖణే అనాగతఞ్చ చిత్తం న నిరుజ్ఝిత్థ, నో చ తస్స తం చిత్తం న నిరుజ్ఝిస్సతి. భఙ్గక్ఖణే చిత్తం న చేవ నిరుజ్ఝిత్థ న చ నిరుజ్ఝిస్సతి.

(ఖ) యస్స వా పన యం చిత్తం న నిరుజ్ఝిస్సతి తస్స తం చిత్తం న నిరుజ్ఝిత్థాతి?

అతీతం చిత్తం న నిరుజ్ఝిస్సతి, నో చ తస్స తం చిత్తం న నిరుజ్ఝిత్థ. భఙ్గక్ఖణే చిత్తం న చేవ నిరుజ్ఝిస్సతి న చ నిరుజ్ఝిత్థ.

(యస్స చిత్తకే సకభావేన నిద్దిట్ఠే, యం చిత్తకే చ యస్స యం చిత్తకే చ ఏకత్తేన నిద్దిట్ఠే.)