౯. దిట్ఠసుతాదిదస్సనవారో

౧౦౩౬. పఞ్చన్నం ఖన్ధానం కతి దిట్ఠా, కతి సుతా, కతి ముతా, కతి విఞ్ఞాతా, కతి న దిట్ఠా న సుతా న ముతా న విఞ్ఞాతా…పే… సత్తన్నం చిత్తానం కతి దిట్ఠా, కతి సుతా, కతి ముతా, కతి విఞ్ఞాతా, కతి న దిట్ఠా న సుతా న ముతా న విఞ్ఞాతా?

౧౦౩౭. రూపక్ఖన్ధో సియా దిట్ఠో, సియా సుతో, సియా ముతో, సియా విఞ్ఞాతో, సియా న దిట్ఠో న సుతో న ముతో, విఞ్ఞాతో. చత్తారో ఖన్ధా న దిట్ఠా న సుతా న ముతా, విఞ్ఞాతా.

రూపాయతనం దిట్ఠం, న సుతం న ముతం, విఞ్ఞాతం. సద్దాయతనం న దిట్ఠం, సుతం, న ముతం, విఞ్ఞాతం. గన్ధాయతనం… రసాయతనం… ఫోట్ఠబ్బాయతనం న దిట్ఠం న సుతం, ముతం, విఞ్ఞాతం. సత్తాయతనా న దిట్ఠా న సుతా న ముతా, విఞ్ఞాతా.

రూపధాతు దిట్ఠా, న సుతా న ముతా, విఞ్ఞాతా. సద్దధాతు న దిట్ఠా, సుతా, న ముతా, విఞ్ఞాతా. గన్ధధాతు… రసధాతు… ఫోట్ఠబ్బధాతు న దిట్ఠా న సుతా, ముతా, విఞ్ఞాతా. తేరస ధాతుయో న దిట్ఠా న సుతా న ముతా, విఞ్ఞాతా.

తీణి సచ్చాని న దిట్ఠా న సుతా న ముతా, విఞ్ఞాతా. దుక్ఖసచ్చం సియా దిట్ఠం, సియా సుతం, సియా ముతం, సియా విఞ్ఞాతం, సియా న దిట్ఠం న సుతం న ముతం, విఞ్ఞాతం.

బావీసతిన్ద్రియా న దిట్ఠా న సుతా న ముతా, విఞ్ఞాతా. నవ హేతూ న దిట్ఠా న సుతా న ముతా, విఞ్ఞాతా. చత్తారో ఆహారా న దిట్ఠా న సుతా న ముతా, విఞ్ఞాతా. సత్త ఫస్సా న దిట్ఠా న సుతా న ముతా, విఞ్ఞాతా. సత్త వేదనా… సత్త సఞ్ఞా… సత్త చేతనా… సత్త చిత్తా న దిట్ఠా న సుతా న ముతా, విఞ్ఞాతా.